मुंबई–गोवा महामार्गावर बसचा भीषण अपघात; 22 प्रवासी गंभीर जखमी

। खेड । प्रतिनिधी।

मुंबई–गोवा महामार्गावर रायगड जिल्ह्यातील पोलादपूर तालुक्यातील भोगाव गावानजीक पुण्याहून खेडच्या दिशेने येणाऱ्या खाजगी ट्रॅव्हलर बसचा भीषण अपघात झाला. हा अपघात सोमवारी (दि.24) पहाटेच्या पाचच्या सुमारास झाला असून महामार्गावरील पुलाच्या अलीकडे असलेल्या बॅरिकेटला बस धडकल्याने अपघात झाल्याचे बोलले जात आहे. या अपघातात 22 प्रवासी गंभीर जखमी झाले असून त्यातील 10 प्रवाशांची प्रकृती अत्यंत चिंताजनक आहे.

मुंबई – गोवा राष्ट्रीय महामार्गावरील कामामुळे एक लेन बंद ठेवण्यात आली होती. पहाटे धुके असल्याने चालकाच्या नजरेस बॅरिकेटस् न पडल्याने बस बॅरिकेटला धडकली व सुमारे 45 ते 50 फूट खोल दरीत कोसळली. स्थानिक नागरिकांनी तत्काळ बचावकार्य सुरू करत जखमींना वर काढले. पोलिस व महामार्ग सुरक्षा पथकानेही घटनास्थळी धाव घेऊन मदतकार्य सुरू केले.जखमींवर खेड तालुक्यातील कळंबनी उपजिल्हा रुग्णालयात उपचार सुरू आहेत. घटनास्थळी मोठी वाहतूक कोंडी झाल्याने महामार्ग पोलिसांनी वाहतूक सुरळीत करण्यासाठी विशेष पथके तैनात केली आहेत. धुके, सुरू असलेले काम आणि अस्पष्ट बॅरिकेटिंग यामुळे हा गंभीर अपघात झाल्याची प्राथमिक माहिती मिळत असून पुढील तपास पोलादपूर पोलीस करत आहेत.

या अपघातात जखमी झालेल्यांची नावे खालीलप्रमाणे -
शामल विजय अंजर्लेकर, काजल मारुती शिगवण, दिलीप शिवराम मोहिते, अमरनाथ मिलिंद कांबळे, दिपाली दत्ताराम नाचरे, प्रतीक प्रकाश गुरव, प्रिया प्रकाश गुरव,आळंदी बालाजी नाचरे, सर्वेश दीपक गुहागरकर, मयुरी मारुती शिगवण याशिवाय चालक, वाहक तसेच इतर दहा प्रवाशांना चिपळूण येथील खासगी रुग्णालयात तसेच डेरवण रुग्णालयात उपचारासाठी हलवण्यात आले आहे.