साडेसात लाखांच्या कथित तडजोडीच्या चर्चांनी खळबळ; रेवदंडा पोलिसांच्या भूमिकेवर संशय
| रेवदंडा | विशेष प्रतिनिधी |
रेवदंडा परिसरात रविवारी पहाटे सुमारे 22 लाख रुपयांचा गुटखा जप्त झाल्याची जोरदार चर्चा असताना, या प्रकरणात सुमारे साडेसात लाख रुपयांच्या कथित तडजोडीनंतर कारवाई दडपल्याच्याही चर्चा रंगल्या आहेत. एवढ्या मोठ्या कारवाईनंतरही कोणताही गुन्हा दाखल झाल्याची अधिकृत माहिती समोर न आल्याने आणि पोलिसांकडून कोणतेही स्पष्टीकरण न मिळाल्याने रेवदंडा पोलिसांच्या कार्यपद्धतीवर गंभीर प्रश्नचिन्ह निर्माण झाले आहे.
स्थानिक स्तरावर सुरू असलेल्या चर्चेनुसार, रविवारी पहाटे बंदी घातलेला मोठ्या प्रमाणात गुटखा जप्त करण्यात आला. मात्र, त्यानंतर संबंधितांवर नेमकी कोणती कायदेशीर कारवाई झाली, किती आरोपींना ताब्यात घेण्यात आले आणि जप्त मालाचे पुढे काय झाले, याबाबत कोणतीही अधिकृत माहिती जाहीर करण्यात आलेली नाही.
रेवदंडा परिसरात गुटख्याच्या अवैध व्यापाराविरोधात यापूर्वीही रायगडच्या जिल्हा पोलीस अधीक्षक आचल दलाल यांनी स्वतः लक्ष घालून धडक कारवाई केली होती. त्यानंतरही याच परिसरात वारंवार गुटखा सापडत असल्याच्या घटना समोर येत असल्याने स्थानिक पोलिसांच्या कामगिरीवर प्रश्न उपस्थित होत आहेत. सध्या रेवदंडा पोलीस ठाण्याचा कार्यभार काहीच दिवसांपूर्वी पोलीस निरीक्षक सुजित गडदे यांच्याकडे सोपविण्यात आला आहे. एवढ्या मोठ्या प्रमाणात गुटखा जप्त झाल्याची चर्चा होत असताना, गुन्ह्याची नोंद आणि कारवाईबाबत मौन का पाळले जात आहे, असा सवाल नागरिकांकडून उपस्थित केला जात आहे.
महाराष्ट्रात गुटखाबंदी लागू असतानाही रेवदंडा परिसरातून अलिबाग, मुरुड, रोहा, श्रीवर्धन आणि तळा तालुक्यात मोठ्या प्रमाणावर गुटख्याचा पुरवठा होत असल्याची चर्चा आहे. त्यामुळे या अवैध साखळीला नेमके कोणाचे संरक्षण आहे, याचीही चौकशी होणे आवश्यक असल्याची मागणी होत आहे. या संपूर्ण प्रकरणाचा खुलासा करून जप्ती, गुन्हा, आरोपी, जप्त माल आणि कथित तडजोडीच्या चर्चांची सत्यता जनतेसमोर आणावी. तसेच जिल्हा पोलीस अधीक्षक आचल दलाल यांनी या प्रकरणात स्वतः लक्ष घालून सखोल चौकशी करावी आणि दोषींवर कठोर कारवाई करावी, अशी जोरदार मागणी नागरिकांकडून केली जात आहे.
दरम्यान, याबाबतची अधिक माहिती जाणून घेण्यासाठी रेवदंडा पोलीस ठाण्याचे पोलीस निरीक्षक सुजित गडदे यांच्याशी संपर्क साधला असता होऊ शकला नाही.
टेम्पोला मोटारसायलची नंबर प्लेट?
रेवदंडा परिसरात ज्या टेम्पोतून कथित 22 लाख रुपयांचा गुटखा जप्त करण्यात आला, त्या टेम्पोवर मोटारसायकलची (शाईन) नंबर प्लेट लावण्यात आल्याची चर्चा स्थानिक स्तरावर रंगली आहे. तसेच ही कारवाई रविवारी पहाटे रेवदंडा हायस्कूलजवळील बहिरीची गल्ली येथे करण्यात आल्याचेही बोलले जात आहे. जर या चर्चेत तथ्य असेल, तर मोटारसायकलचा नंबर असलेले वाहन एवढ्या मोठ्या प्रमाणात अवैध मालाची वाहतूक कशी करत होते? वाहनाची तपासणी झाली का? मूळ वाहन क्रमांक कोणता होता? असे अनेक प्रश्न निर्माण होत आहेत.