। नवी मुंबई । प्रतिनिधी ।
12 वर्षांच्या मुलीचा विनयभंग केल्याच्या आरोपाखाली नवी मुंबईतील नेरुळ पोलिसांनी एका व्यक्तीला अटक केली आहे. पीडितेच्या आईच्या तक्रारीनंतर ही कारवाई करण्यात आल्याची माहिती आहे. या व्यक्तीने अल्पवयीन मुलीला तिच्या भावाला संपवण्याची धमकी देत तिच्यावर अत्याचार केल्याचा आरोप आहे. या घटनेने नवी मुंबईत संतापाची लाट उसळली आहे.
मिळालेल्या माहितीनुसार, मुलीची आई कामावर गेली असताना, ही अल्पवयीन मुलगी घरी एकटी असताना ही घटना घडली आहे. एका व्यक्तीने अल्पवयीन मुलगी घरी एकटी असल्याचा फायदा घेत तिला आपल्या घरी नेलं. त्यानंतर, त्याने तिला तिच्या भावाला जिवे मारण्याची धमकी दिली. भावाला मारण्याची धमकी ऐकताच ती घाबरली. अल्पवयीन मुलीला दबावाखाली आणून तिचे कपडे काढण्यास भाग पाडले गेले आणि मग आरोपीने तिच्यावर लैंगिक अत्याचार केला.
या घटनेनंतर घरी परतल्यावर मुलीने रडत रडत तिच्या आईला घडलेला प्रकार सांगितला. हे ऐकताच आईच्या पायाखालची जमीन सरकली. आईने ताबडतोब नेरुळ पोलीस ठाण्यात जाऊन तक्रार दाखल केली. पोलिसांनी मुलीची वैद्यकीय तपासणी केली, ज्यामध्ये तिच्यावर लैंगिक अत्याचार झाल्याचे सिद्ध झाले. त्यानंतर पोलिसांच्या पथकाने आरोपीला त्याच्या घरातून अटक केली. या घटनेने नवी मुंबई परिसरात संतापाची लाट उसळली असून, नराधमाला फाशीची शिक्षा द्यावी अशी मागणी होत आहे. त्याच प्रमाणे लहान मुलांवरील अत्याचाराचे प्रमाण वाढले असल्याचंही या घटनेने पुन्हा एकदा सिद्ध झाले आहे. पोलीस या घटनेबाबत अधिक तपास करीत आहेत.
अल्पवयीन मुलीवर लैंगिक अत्याचार; एकाला अटक
