वरसोली, दिवेआगरचा शॅक प्रकल्प अधांतरीच

पर्यावरण विभागाच्या, मंजुरीच्या प्रतिक्षेत
| अलिबाग | विशेष प्रतिनिधी |
तालुक्यातील वरसोली व श्रीवर्धन तालुक्यातील दिवेआगर समुद्रकिनारी समुद्र कुटी (बीच शॅक्स) प्रकल्प राबविण्यात येणार आहे. हा प्रकल्प पूर्णत्वास आल्यास येथील पर्यटन वाढीसोबत स्थानिकांना रोजगार उपलब्ध होणार आहे. विशेष म्हणजे वरसोली व दिवेआगर ग्रामपंचायतीने प्रकल्प अनुषंगाने एमटीडीसीला सर्वोतोपरी सहकार्य केले आहे. मात्र पर्यावरण विभागाच्या मंजूरीच्या प्रतिक्षेत हा अडकला असून, शॅक प्रकल्प अधांतरी राहिला आहे.

रायगड जिल्हा पर्यटन दृष्ट्या महत्त्वपूर्ण जिल्हा आहे. येथील समुद्रकिनारी मोठ्या संख्येने नियमित पर्यटक येतात. जिल्ह्यातील पर्यटनाला आणखी चालना मिळावी यासाठी तत्कालीन महाविकास आघाडी सरकारने पर्यटन विभागाच्या माध्यमातून रायगड, रत्नागिरी, सिंधुदुर्ग, पालघर या जिल्ह्यात गोवा राज्याच्या धर्तीवर समुद्र कुटी संकल्पना राबविण्याचा निर्णय घेतला. त्यानुसार रायगड जिल्ह्यात अलिबाग तालुक्यातील वरसोली तर श्रीवर्धन तालुक्यातील दिवेआगर या दोन समुद्रकिनारी प्रकल्प तयार करण्यास शासनाने मंजुरी दिली.

या प्रकल्पामुळे पर्यटनास चालना मिळून स्थानिकांना रोजगार संधी आणि आर्थिक स्तरही उंचावला जाणार होता. यामुळे वरसोली ग्रामपंचायत व दिवेआगर ग्रामपंचायतीने गावाच्या विकासाच्या दृष्टीने आणि पर्यटन वाढीसाठी प्रकल्पाला सर्वत्तोपरी मदत करीत एमटीडीसीला जागा उपलब्ध करून दिली आहे. तसेच शासनाने दोन्ही प्रकल्पासाठी कन्सल्टंट नेमण्यात आलेले आहेत. मात्र अद्याप प्रकल्पाची एकही विट रचली गेलेली नाही.

समुद्र कुटी प्रकल्प हा समुद्र किनारी होणार आहे. त्यामुळे त्याला पर्यावरण विभागाची मंजुरीही आवश्यक आहे. तसेच काही ठिकाणी वन विभागही असल्याने त्याचीही परवानगी आवश्यक आहे. या विभागांकडून आवश्यक त्या परवानग्या अद्याप प्राप्त झालेल्या नाहीत. प्रकल्पाच्या रचनेनुसार केलेले बांधकाम हे समुद्र किनारी होणार असल्याने तो नैसर्गिक आपत्ती काळात ते हलविणे सोयीस्कर असणे ही महत्वाचे आहे. त्या अनुषंगाने योजना करून हा प्रकल्प उभारला जाणार आहे.

या प्रकल्पाचा सर्व्हे, प्लॅन करून देण्याची जबाबदारी कन्सल्टंटवर आहे. मात्र त्यांना गुहागर येथे हवी तशी मदत मिळत नसल्याने प्रकल्प पुढे सरकला नाही आहे. मात्र वरसोली येथे ग्रामपंचायत पूर्ण मदत करीत असूनही दुर्लक्ष केले जात आहे. त्यामुळे एमटीडीसी व कन्सल्टंट कंपनीत योग्य समन्वय नसल्याने समुद्र कुटी प्रकल्पाला जागा उपलब्ध असूनही प्रकल्प कागदावरच राहिला आहे. त्यामुळे पर्यटन वाढीसाठी प्रकल्प करण्याचा हेतू अद्याप विविध विभागाच्या आणि पर्यावरण विभागाच्या मंजुरीसाठी असफल राहिला आहे.

वरसोलीत 10 कुटी
गोवा राज्यात समुद्र किनारी वाळूत खुर्चीवर बसून लाटांचा व खाद्यपदार्थांचा आनंद घेता येतो. वरसोली आणि दिवेआगर समुद्रकिनारी 1515 फूट उंच आणि 12 फूट उंच 20 15 चे छत अशा 10 कुटी पर्यटकांच्या बसण्यासाठी बांधण्यात येणार आहेत. याठिकाणी सीसीटीव्ही लावले जाणार असून सकाळी सात ते सायंकाळी सात वाजेपर्यत पर्यटकांना याचा वापर करता येणार आहे. कुटी मिळणार्‍या व्यक्तीकरिता परवान्यासाठी 15 हजार रुपये अर्जाचे ना-परतावा मुल्य असेल. तसेच या कुटीसाठी पहिल्या वर्षी 45 हजार, दुसर्‍या वर्षी 50 हजार, तिसर्‍या वर्षी 55 हजार वार्षिक शुल्क राहील. याशिवाय 30 हजार रुपये सुरक्षा अनामत जमा करावी लागेल, जी तीन वर्षाचा कालावधी संपल्यानंतर परत केली जाईल. चौपाटी कुटी चालविण्यासंदर्भात पर्यटन विभागाने विविध नियम घालून दिले आहेत.

वरसोली येथे समुद्र कुटी प्रकल्प मंजूर झाला आहे. या प्रकल्पामुळे भागाचा विकास होऊन पर्यटन वाढीलाही चालना मिळणार आहे. यासाठी चार एकर जागा मोजून एमटीडीसीच्या ताब्यात दिली आहे. मात्र अद्यापही जागेवर प्रकल्पाबाबत प्लॅन तयार नाही, कशा पद्धतीने हा प्रकल्प होणार याची माहिती नाही. त्यामुळे अद्याप प्रकल्पाबाबत कोणतीही हालचाल सुरू नाही आहे. त्यामुळे प्रकल्प कधी होणार याबाबत कोणतीही माहिती नाही आहे. – मिलिंद कवळे, उपसरपंच, वरसोली ग्रामपंचायत