शरद पवारांचं ठरलं…बदल होणार हे नक्की

| सोलापूर | प्रतिनिधी |
दिवाळी हा सण शरद पवार व अजित पवार यांनी एकत्र साजरा केल्यानंतर राजकिय वर्तुळात उलटसूलट चर्चांना उधाण आले होते. मात्र सोलापूरमध्ये गुरुवारी (दि. 16) आयोजित केलेल्या शेतकरी मेळाव्यात शरद पवार यांनी अजित पवार गटाच्या दोन बड्या नेत्यांना आक्रमक इशारा दिल्यामुळे या चर्चांना पूर्णविराम मिळाला. येत्या निवडणूकीत अजित पवार गटातील बबनदादा शिंदे यांचा बंदोबस्त करण्याचा तर अनिल पाटील पुन्हा निवडून येणार नाही, असा इशारा त्यांनी दिला. येत्या निवडणूकीत बदल होणार असल्याचं शरद पवार यांनी स्पष्टपणेच सांगितलं. त्यांच्या या इशाऱ्यानंतर अजित पवार गटाकडून काय प्रतिक्रिया येते ते पाहणं महत्त्वाचं ठरणार आहे.

राष्ट्रवादी काँग्रेसचे अध्यक्ष शरद पवार आता दिवाळीनंतर पुन्हा एकदा ॲक्शन मोडमध्ये आले आहेत. सोलापुरात शेतकरी मेळाव्याचं आज आयोजन करण्यात आलं. या कार्यक्रमाला शरद पवार उपस्थित होते. विशेष म्हणजे या कार्यक्रमात भाषण करताना शरद पवार यांनी राष्ट्रवादी काँग्रेसच्या दोन मोठे नेते आणि आमदारांना इशारा दिला. यामध्ये एक आमदार हा राज्याचा मदत आणि पुनर्वसन विभागाचा मंत्री आहे. शरद पवार पहिल्यांदाच दोन नेत्यांच्या बद्दल इतकं आक्रमक आणि टोकाचं बोलले आहेत. याशिवाय शरद पवार यांनी या दोन्ही नेत्यांबद्दल भीष्मप्रतिज्ञा घेतली आहे. त्यामुळे आगामी काळात या दोन्ही नेत्यांच्या अडचणीत वाढ होते का ते पाहणं महत्त्वाचं ठरणार आहे.

शरद पवारांनी शेतकऱ्यांना बबनदादा शिंदे यांच्या विरोधातील कागदपत्राचे पुरावे आपल्याकडे देण्याचं आवाहन केलं आहे. त्यातून शरद पवार बंदोबस्त करणार असल्याचं म्हणाले आहेत. तर अनिल पाटील यांच्या मतदारसंघात आपण गेलो असून ते पुन्हा निवडून येणार नाहीत, असं शरद पवार म्हणाले आहेत.

आ.बबनदादा शिंदे यांच्यावर टीका
इथल्या नेत्याने शेतकऱ्यांच्या नावावर कर्ज काढले. त्याबाबत माझ्याकडे कागदपत्रे द्या. ती कागदपत्रे घेऊन आल्यावर मी त्याचा जो बंदोबस्त करायचा तो बंदोबस्त करतो, अशा इशारा शरद पवारांनी दिला. इथले नेतृत्व काही जणांवर दबाव आणत आहे. मात्र त्या दबावाला झुगारून आपण काम करूया, असंही शरद पवार यावेळी म्हणाले.

दिवाळीनंतर जागवाटप
मंत्री अनिल पाटील यांच्या मतदार संघात मी दौरा केलाय. पुढील विधानसभेला ते निवडून येणार नाहीत, असा मोठा इशारा शरद पवारांनी दिला. आम्ही दिवाळीनंतर जागवाटपाबाबत चर्चा करून निर्णय घेऊ. लवकरच जागावाटप झालेलं पाहायला मिळेल. काँग्रेस, राष्ट्रवादी काँग्रेस आणि शिवसेना यांच्यासोबतच काही स्थानिक पक्षाला सोबत घेऊन जागावाटप होईल, असं शरद पवार म्हणाले.