नागरिक आणि वाहनचालक त्रस्त
। महाड । प्रतिनिधी ।
महाड शहरापासुन एक किलोमीटर अंतरावर असलेल्या महाड ते शिरगाव सुरु असलेल्या रस्त्याच्या काँक्रीटीकरणाचे काम संथगतीने सुरु असून दीड किमी अंतराच्या या कामाला दोन महिने लागल्याने ग्रामस्थ आणि वाहनचालक त्रस्त झाले आहेत. शहरालगत असलेल्या या कामावर सार्वजनिक बांधकाम विभागाचे अधिकारी देखील दुर्लक्ष करत असल्याने ठेकेदाराला रान मोकळे झाले आहे.
महाड शहरातून विन्हेरे तुळशीखिंड मार्गे खेड आणि दापोली, मंडणगड, म्हाप्रळकडे जाणारे मार्ग दादली, शिरगाव या गावांना जोडत जातात. सद्या महाड म्हाप्रळ पंढरपूर तसेच दापोली मधील आंबडवे गावला जोडणार्या रस्त्यांचे काम सुरु आहे, यातील एक टप्पा महाड दादली शिरगाव या गावांदरम्यान सुरु आहे. काँक्रीट पद्धतीने येथील काम सुरु असून रस्त्याचे रुंदीकरण देखील केले जात आहे. याकरिता मूळ डांबरी रस्ता पूर्णपणे काढण्यात आहे. दोन्ही बाजूला मातीचा भराव टाकण्यात आला आहे. दोन महिन्यापूर्वी रस्त्याचे काम सुरु करण्यात आले. शिरगाव दादली हे अंतर जेमतेम दीड किमी आहे. शिवाय महाड शहरालगत असल्याने याठिकाणी सतत वर्दळ सुरु आहे. दादली शिरगाव दरम्यान रस्त्याचे काम सुरु असल्याने आणि पक्का पर्यायी मार्ग न केल्याने याठिकाणी वाहतूक कोंडी होत आहे. या वाहतूक कोंडीचा स्थानिक वाहनचालकांना देखील प्रचंड त्रास सहन करावा लागत आहे.
महाड जवळील सावित्री नदीवर असलेला दादली पुलावरील रस्ता आधींच खराब झाला असून त्यापुढे सुरु असलेल्या या रस्त्याच्या कामामुळे दादली आणि शिरगाव दरम्यान असलेल्या नागरिकांना धुळीचा देखील सामना करावा लागत आहे. दादली – किंजळघर गावातील अनेक घरे या रस्त्यालगत आहेत. वाहनचालकांच्या वर्दळीमुळे रस्त्यावरील धूळ घरातून जात असल्याने घरात मोठ्या प्रमाणात धूळ साचत आहे. शिवाय दादली शिरगाव याठिकाणी असेल्या खाद्य पदार्थ विक्रेत्यांचे देखील हाल झाले आहेत. अवघ्या दीड किमी रस्त्याला दोन महिने लागल्याने स्थानिक नागरिकांनी संताप व्यक्त केला आहे. संबंधित ठेकेदाराकडून खोदलेल्या ठिकाणी पाणी मारले जात नसल्याने हि धूळ उडत आहे. शिवाय ज्या ठिकाणी रस्ता बदल केला आहे त्याठिकाणी कोणत्याच प्रकारचे फलक लावलेले नाहीत. यामुळे वाहनचालकांना रस्ता चुकण्याची वेळ येत आहे.
शिरगाव ते महाड रस्त्याचे काम संथगतीने; दीड किमी अंतराला लागले दोन महिने
![](https://krushival.in/grygrars/2022/04/mahad-road-1024x576.jpg)