सेटलमेंट की घाबरगुंडी रायगड मधील जनतेत चर्चेला ऊत
पेण | विशेष प्रतिनिधी |
मोठा गाजावाजा करीत जेएसडब्लू कंपनीविरोधात शिवसेनेने अलिबाग आमदार तथा साडे तीन तालुक्याचे जिल्हा प्रमुख यांच्या नेतृत्वाखाली पुकारलेले आंदोलन पळपुटेपणा दाखवत स्थगित केले आहे. अचानक पोलिसांचे कारण पुढे करीत माघार घेतल्याचे जाहीर करण्यात आल्याने सेटलमेंट केली की कारवाईच्या भीतीने घाबरगुंडी उडून पळ काढला अशी चर्चा सर्वत्र सुरू आहे. पेण येथे घेतलेल्या पत्रकार परिषदेत याबाबत ची घोषणा करण्यात आली आहे. यापूर्वी देखील या कंपनी विरोधात पुकारलेले आंदोलन मागे घेतले होते.
पोलादनिर्मिती कंपनी करणारी जिंदाल स्टील वर्क्स ही कंपनी पेण तालुक्यातील वडखळनजीक डोलवी येथे कार्यरत आहे. या कंपनीने स्थानिक बेरोजगार तरुणांना नोकर्या न देता सुमारे 25 ते 30 हजार परप्रांतीय कामगारांची भरती केल्याच्याविरोधात शिवसेनेने 18 ऑक्टोबरला जनआंदोलनाचा इशारा दिला होता.
या आंदोलनाच्या पार्श्वभूमीवर, कंपनी प्रशासनाच्या वरिष्ठ अधिकार्यांनी राज्याचे उद्योगमंत्री सुभाष देसाई यांच्याशी संपर्क साधला व त्यांच्या मुंबई येथील शिवनेरी निवासस्थानातील दालनात बैठक घेतली. या बैठकीला कंपनीचे अधिकारी एस.एम. पाटील, प्रेसिडेंट गजराज राठोड, व्हाईस प्रेसिडेंट कॅप्टन राजेश रॉय, एचआर हेड दिलीप कुमार सिन्हा, जनरल मॅनेजर प्रविण म्हात्रे यांच्यासह वरिष्ठ अधिकारी, अलिबागचे आमदार, खालापूरचे आमदार महेंद्र थोरवे उपस्थित होते.