अलिबागमध्ये एकमेकांविरोधात लढा
| रायगड | जिल्हा प्रतिनिधी |
अलिबागमध्ये एका शिक्षण संस्थेसाठी एकमेकांविरोधात लढा झाल्याचा प्रकार सोमवारी (दि.25) दुपारी घडला. पनवेल येथील एका शिक्षण संस्थेच्या कारभाराविरोधात अनिल ढवळे यांनी उपोषण सुरु केले आहे. मात्र, हे उपोषण ढोंगी असल्याचा ठपका ठेवत शिवकर येथील ग्रामस्थांनी उपोषण मोडीत काढण्याचा प्रयत्न केला. त्यामुळे परिसरात तणावाचे वातावरण निर्माण झाले होते. मात्र, पोलिसांनी मध्यस्थीची भुमिका घेऊन वातावरण शांत केले. परंतु, हे उपोषण खोटे असल्याचा आरोप ग्रामस्थांनी केला आहे. तर, ही लढाई सत्यासाठी असल्याचे उपोषणकर्त्यांकडून सागंण्यात आले आहे.
मिळालेल्या माहितीनुसार, पनवेल तालुक्यातील शिवकर येथील श्री गणपती देवस्थान ट्रस्ट या संस्थेच्या श्री गणपती इंग्लीश मिडीअम स्कूल या संस्थेच्या मुख्य विश्वस्त म्हणून दिलेले हमीपत्र खोटे व बनावट आहे. त्यांच्याविरोधात फौजदारी गुन्हा दाखल करण्यात यावा, असा आरोप करीत पनवेलमधील शिवकर येथील अनिल ढवळे यांनी अलिबागमध्ये माध्यमिक शिक्षण अधिकारी कार्यालयासमोर उपोषण सुरु केले. मात्र, हे उपोषण ढोंगी असल्याचा आरोप करीत शिवकर येथील ग्रामस्थांनी देखील या कार्यालायसमोर आंदोलन केले. या आंदोलनात शेकडो ग्रामस्थ सहभागी झाले होते. ढवळे यांचा आरोप खोटा असून, ते त्रास देण्यासाठी उपोषण करीत असतात. त्यांचे कोणतेच उपोषण अद्याप यशस्वी झाले नाही, अशी प्रतिक्रीया तेथील ग्रामस्थांनी दिली.
दरम्यान, ढवळे हे उपोषणाला बसले असताना, त्यांच्या उपोषणाला रोखण्यासाठी जमाव जमला होता. या घटनेची माहिती अलिबाग पोलिसांना मिळताच पोलीस निरीक्षक किशोर साळे, सहाय्यक पोलीस निरीक्षक हनुमंत शिंदे, पोलीस उपनिरीक्षक, पोलीस हवालदार, महिला पोलीस आदी 15 हून अधिक अधिकारी, कर्मचारी घटनास्थळी दाखल झाले. त्यांच्याकडून संतत्प झालेल्या मंडळींनी शांत करण्यात आले. मात्र, दुपारपर्यंत कोणताही तोडगा निघाला नाही. त्यामुळे त्या परिसरात पोलिसांचा कडेकोट बंदोबस्त ठेवण्यात आला होता.