धक्कादायक! पत्नीस लाथ मारून गर्भपात

दुसर्‍या तरुणीसह पलायन

| पनवेल | वार्ताहर |

पनवेलमधील मोहल्ला परिसरातील एका तरुणाने क्रुरपणाचा कळस घातला आहे. आपल्या गर्भवती पत्नीस पोटात लाथ मारून तिचा गर्भपात केला. तसेच दुसर्‍या एका 19 वर्षीय तरुणीला आपल्या प्रेमाच्या जाळ्यात ओढून पळून नेणार्‍या या तरुणास पनवेल शहर पोलिसांनी अटक केली आहे.

पनवेल मधील मोहल्ला परिसरात चिकन सेंटरवर काम करणार्‍या इसरार इनाम सलमानी (वय 27) याने आपल्या गर्भवती पत्नीच्या पोटात लाथ मारून तिचा गर्भपात केला. तसेच परिसरातील एका 19 वर्षीय तरुणीला आपल्या प्रेमाच्या जाळ्यात ओढून तिच्यासोबत परराज्यात पळून गेला होता. यासंदर्भात पीडित पत्नीने इसरार विरोधात पनवेल शहर पोलीस ठाण्यात गुन्हा दाखल केला होता. तसेच इसरार सोबत पळून जाणार्‍या तरुणीच्या कुटुंबीयांनी सुद्धा ती हरवल्याची तक्रार दाखल केली होती. त्यानुषंगाने पनवेल शहर पोलीस ठाण्याचे वरिष्ठ पोलीस निरीक्षक विजय कादबाने यांच्या मार्गदर्शनाखाली पोलीस उपनिरीक्षक महाडिक, पोलीस हवालदार परेश म्हात्रे, रुपेश पाटील, महिला पोलीस शिपाई वैशाली धनगर आदींच्या पथकाने सदर आरोपीचा शोध घेत असताना तांत्रिक तपास व गुप्त माहितीदाराच्या सहाय्याने इसरार हा दिल्ली जवळील लोणी, गाजियाबाद येथे खोली भाड्याने घेऊन बेपत्ता तरुणीसह राहत असल्याची माहिती मिळाली. तो त्यानुसार या पथकाने दिल्ली गाठत इसरार सलमानी याला अटक केली. तसेच बेपत्ता तरुणीला तिच्या वडिलांच्या ताब्यात दिले. याप्रकरणी अधिक तपास पोलीस उपनिरीक्षक गणेश फडतारे करीत आहेत.