बारामतीत काका-पुतण्याची दिलजमाई

| बारामती | प्रतिनिधी |

बारामती नगरपरिषद हा उपमुख्यमंत्री अजित पवार यांचा बालेकिल्ला मानला जातो. पवार कुटुंबाच्या होमपिचवर आता काका पुतण्या एकत्र येण्याची चिन्हं आहेत. अजित पवार यांच्या नेतृत्वातील राष्ट्रवादी काँग्रेस आणि राष्ट्रवादी काँग्रेस शरदचंद्र पवार या दोन्ही पक्षांची युती आगामी निवडणूकीतून दिसण्याची चिन्हे आहेत. अंतर्गत माहितीनुसार अजित पवार हे शरद पवारांच्या पक्षासाठी शहरातील नगरसेवक पदाच्या काही जागा सोडण्याची शक्यता आहे. या पार्श्वभूमीवर बारामतीतून सुरुवात झाली, तर युती राज्यभरातही पोहोचू शकते.

बारामती नगरपरिषदेसाठी गुरुवारी अजित पवार इच्छुक नगरसेवकांच्या मुलाखती घेणार आहेत. या दरम्यान ते नगराध्यक्षपदाचा उमेदवार जाहीर करु शकतात. अर्थात नगराध्यक्षपदासाठी मतैक्य होत नसेल, तर अजित पवार अगोदर 41 नगरसेवकांच्या जागा निश्चित करण्याची शक्यता आहे. यामध्येच ते शरद पवारांच्या पक्षासाठी काही जागा सोडण्याची शक्यता वर्तवली जात आहे. दुसरीकडे युगेंद्र पवार यांनी त्यांच्या पक्षाकडून इच्छुक असलेल्या उमेदवारांच्या मुलाखती सोमवारी घेतल्या. युगेंद्र पवारांनी माळेगाव नगरपंचायतीसाठी इच्छुक असलेल्या उमेदवारांशीही चर्चा केली.

माळेगाव व बारामतीत ही दिलजमाई खरोखरच झाली, तर त्याचे पडसाद राज्यभर उमटू शकतात. राज्यातील इतरही ठिकाणी हे दोन्ही गट एकत्र येऊ शकतात. अर्थात इंदापूर तालुक्यातील छत्रपती व बारामती तालुक्यातील माळेगाव साखर कारखान्याच्या निवडणुकीत अजित पवारांनी शेवटपर्यंत या पक्षाच्या पदाधिकाऱ्यांना झुलवत ठेवले व पदरात काहीच पडले नाही, हा पूर्वानुभवही शरद पवारांच्या पक्षाला आहे. त्या पार्श्वभूमीवर ही फक्त चर्चा आणि अफवाच राहील की, राज्यातील सध्याच्या राजकीय परिस्थितीत भाजपला इशारा देण्यासाठी खरोखरच अजित पवारांची शरद पवारांच्या पक्षाबरोबर दिलजमाई होणार हे येत्या काही दिवसांत ठरेल.

शरद पवार यांनी काही दिवसांपूर्वीच आपले पत्ते खुले असल्याचे दाखवताना भाजप सोडून अन्य कोणत्याही पक्षांशी युती करण्यासाठी आपल्या पदाधिकाऱ्यांना अधिकार दिले आहेत. हे स्थानिक पातळीवर ठरवावे अशा सूचनाही दिल्या आहेत. त्याच पार्श्वभूमीवर या संभाव्य युती किंवा आघाडीची सुरुवात बारामतीतून होते का, याकडे राजकीय तज्ज्ञांचेही लक्ष आहे.