संतोष देशमुख हत्येच्या निषेधार्थ बीडमध्ये मूक मोर्चा

धनंजय मुंडेंची हकालपट्टी करा, आंदोलकांची मागणी

| बीड | प्रतिनिधी |

मस्साजोग येथील सरपंच संतोष देशमुख यांच्या हत्येच्या निषेधार्थ बीडमध्ये शनिवारी (दि. 28) सर्वपक्षीय मूक मोर्चा काढण्यात आला. हा मूक मोर्चा जिल्हाधिकारी कार्यालवयावर धकडला. या मूक मोर्चातून सर्वपक्षीय नेत्यांनी आणि आंदोलकांनी आपला आक्रोश व्यक्त केला. धनंजय मुंडे यांची मंत्रिमंडळातून हकालपट्टी करा आणि वाल्मिक कराडला अटक करा, अशी जोरदार मागणी आंदोलकांनी केली.

सरपंच संतोष देशमुख यांच्या हत्याकांडाला आज 19 दिवस पूर्ण झाले आहेत. तरीही यातील संशयित मुख्य आरोपी सुदर्शन घुले आणि कृष्णा आंधळे, सुधीर सांगळे हे तिघे फरार आहेत. तसेच मंत्री धनंजय मुंडे यांचे निकटवर्तीय वाल्मीक कराड हे संतोष देशमुख हत्याकांडातील मास्टर माईंड असल्याची चर्चा असून, या प्रकरणाशी संबंधित असलेल्या पवन ऊर्जा प्रकल्पाच्या खंडणी प्रकरणात त्यांचे नाव आलेले आहे. दरम्यान संतोष देशमुख हत्याकांडातील सर्व आरोपींना तात्काळ अटक करून त्यांना फाशी देण्यात यावी. तसेच या गुन्ह्यात वाल्मीक कराड यांचाही आरोपी म्हणून समावेश करण्यात यावा यासाठी तसेच संतोष देशमुख यांच्या मारेकर्‍यांना शिक्षेच्या मागणीसाठी बीडमध्ये मूक मोर्चात रस्त्यावर जनसागर उसळला. सर्वपक्षीय मूक मोर्चाला विराट स्वरूप आले. बीडमधील या सर्वपक्षीय मूक मोर्चामध्ये देशमुख कुटुंबीय सहभागी झाले. या मोर्चात महिलाही मोठ्या प्रमाणात सहभागी झाल्या. संतोष देशमुख त्याप्रकरणातील आरोपीला अटक करा, अशा घोषणा देण्यात येत आहे. डॉ. बाबासाहेब आंबेडकर यांच्या पुतळ्यापासून मोर्चाला सुरुवात झाली. सुभाष रोडवरून हा मोर्चा पुढे गेला. अण्णाभाऊ साठे चौक ते छत्रपती शिवाजीराज चौकापर्यंत हा विराट मोर्चा निघाला.

मोर्चात काळे झेंडे आणि संतोष देशमुख यांना न्याय देण्याची मागणी करणारे फलक या मोर्चात दिसून आले. मूक मोर्चामध्ये सर्वपक्षीय नेते सहभागी झाले. सुरेश धस, बजरंग सोनवणे, संभाजीराजे छत्रपती, संदीप क्षीरसागर, ज्योती मेटे, प्रकाश सोळंके, जितेंद्र आव्हाड, अभिमन्यू पवार, मेहबूब शेख या मोर्चामध्ये सहभागी झाले. यासोबतच मराठा आरक्षण आंदोलनकर्ते मनोज जरांगे-पाटील देखील या मोर्चामध्ये सहभागी झाले.