। अलिबाग । प्रतिनिधी ।
प्रसिद्ध पार्श्वगायक कृष्णकुमार कुन्नथ म्हणजेच केके चं मंगळवारी रात्री पावणे अकराच्या सुमारास कोलकाता येथे आकस्मिक निधन झालं. याबाबतचे वृत्त प्रसारमाध्यमातून प्रसिद्ध होताच अलिबागमधील संगीतक्षेत्रात हळहळ व्यक्त करण्यात आली.एक अष्टपैलू गायक गमावल्याची भावना अनेक मान्यवरांनी व्यक्त केली आहे.
केकेच्या मृत्यूबाबत कोलकाता पोलिसांनी अनैसर्गिक मृत्यूची नोंद केल्याने चर्चांना तोंड फुटलं आहे. न्यू मार्केट पोलीस स्थानकामध्ये केकेचा मृत्यू हा अनैसर्गिक कारणामुळे झाल्याची नोंद पोलिसांनी केली आहे. केकेचा मृत्यू हृदयविकाराच्या झटक्याने झाल्याचं सांगितलं जात होतं. मात्र आता पोलिसांनी अनैसर्गिक मृत्यूची नोंद केल्याने या प्रकरणासंदर्भातील तपास होण्याचीही शक्यता व्यक्त केली जातेय.
केके कॉन्सर्टवरुन परत आल्यानंतर ग्रॅण्ड हॉटेल येथे कोसळला. हे हॉटेल मार्केट पोलीस स्थानकाच्या हद्दीत येतं. केकेला तातडीने रुग्णालयामध्ये दाखल करण्यात आलं. तिथे त्याला मृत घोषित केलं गेलं. तो 54 वर्षांचा होता. केके कोलकात्यामधील गुरुदास कॉलेजमधील नाझरुल मंचच्या कार्यक्रमामध्ये गात असतानच त्याला अस्वस्थ वाटू लागलं. त्यामुळे तो त्याच्या हॉटेल रुममध्ये परतला होता. तिथेच तो कोसळला आणि त्याला ततडीने रुग्णालयामध्ये दाखल करण्यात आलं. त्याला कोलकात्यामधील सीएमआरआय रुग्णालयात दाखल करण्यात आलं. त्याला रुग्णालयात दाखल करण्याआधीच त्याचा मृत्यू झाला होता. डॉक्टरांनी त्याला ब्रॉट डेड म्हणजेच रुग्णालयात दाखल करण्यापूर्वीच त्याचा मृत्यू झाला, असं घोषित केलं.
सुप्रसिद्घ कृष्ण कुमार कुन्नथ यांचे निधन ही एक दुःखद घटना आहे. संगीत क्षेत्रातला सुरेल तारा नीखळला असं मला वाटत. त्यांच्या आवाजाचा आणि गायकीचा मी खुप मोठा चाहता आहे. संगित क्षेत्राला एक ना अनेक सुपरहीट गाणी देणार्या ह्या व्हर्सटाईल सिंगरला भावपुर्ण श्रध्दांजली.
– योगेश आगरावकर, गायक अलिबाग
के.के. हे माझ्या खूप आवडीचे गायक होते त्यांनी गायलेली सगळीच गाणी खुपचं छान होती पण त्यातील तडप तडप के, आंखोमे तेरी अजबसी अदाए हे ही गाणी मला जास्त भावली …. त्यांच्या अचानक जाण्याने संगीत सृष्टी मध्ये एक पोकळी निर्माण झाली जी कधीही भरून निघणार नाही, त्यांच्या गाण्याच्या माध्यमातून ते नेहमीच अजरामर राहतील.
– जुईली म्हात्रे, गायिका अलिबाग.
केके हे अष्टपैलू गायक होते. अगदी क्लासिक पासून ते रॉकपर्यंत सर्व गाणी त्यांनी गायली आहेत. त्यांच्या आवाजात एक दर्द होता. आणि तो दर्दच गायब झाल्यासारखं वाटतयं. जेव्हा पार्श्वगायन करायचं असतं त्यावेळेला भाव फार महत्तवाच्या असतात. आणि केके या गायकाच्या आवाजात भाव जाणवायचा. त्यांची गाणी ऐकत असताना प्रसंग डोळ्यासमोर उभे राहतात. त्यामुळे त्यांच्या जाण्याने बॉलीवूडमध्ये शोककळा पसरली आहे. जनसामान्यांमध्ये असणार्या त्यांच्या प्रत्येक चाहत्याला भरून आले आहे.
– विक्रांत वार्डे, गायक, अलिबाग
मी सिंगर आहे अणि मी हॉटेल किंवा कॉटेजमध्ये लाईव्ह गाणी गातो. आजपर्यंत बर्याच सिंगरचे सेट मी प्रेक्षकांसमोर सादर केली आहेत पण केकेंची गाणी सादर करताना नेहमीच मला प्रेक्षकांचा भन्नाट प्रतिसाद मिळाला आहे. केकेंची मी अनेक गाणी गायलो त्यातुनच मी शिकत गेलो, एक कलाकार म्हणुन केके खुप जवळचा होता. केकेंच्या अचानक झालेल्या निधनामुळे मला खुप वाईट वाटल. एक उत्तम सिंगर बॉलीवूडने आज गमावला.
– ओजस ठोंबरे, गायक अलिबाग