बिबट्याच्या सहा नखांसह कोट्यवधींचा मुद्देमाल जप्त ; एकाला अटक
| सावंतवाडी | प्रतिनिधी ।
सिंधुदुर्ग जिल्ह्यातील कुडाळ बाजारपेठ येथे ‘मसुरकर जेम्स’ या दुकानावर वनविभागाने छापा टाकून वन्यप्राण्यांच्या अवयवांची मोठी तस्करी उघडकीस आणली आहे. या कारवाईत बिबट्याची सहा नखे, बिबट्याच्या नखांचे 20 अवयव, बिबट्याचे 2 सुळे (दात) आणि वन्यप्राण्यांच्या शिंगापासून तयार केलेली 6 नखे असा मुद्देमाल जप्त करण्यात आला आहे. या प्रकरणी दुकानाचा मालक अजित वसंत मसुरकर याला अटक करण्यात आली असून, न्यायालयाने त्याला 2 दिवसांची वन कोठडी सुनावली आहे.
याबाबत वनविभागाने दिलेल्या माहितीनुसार, वनक्षेत्रपाल यांना कुडाळ बाजारपेठ येथील मसुरकर जेम्स या दुकानात वन्यप्राण्यांच्या अवयवांची बेकायदेशीर विक्री होत असल्याची गोपनीय माहिती मिळाली होती. या माहितीच्या आधारे वनक्षेत्रपाल आणि वनपरिक्षेत्र अधिकारी कुडाळ यांच्या संयुक्त पथकाने दोन पंचांसमक्ष सदर दुकाची झडती घेतली. या झडतीदरम्यान वन्यजीव संरक्षण अधिनियम 1972 च्या अनुसुची-1 मधील संरक्षित प्राणी असलेल्या बिबट्याची शिकार करून, त्यापासून मृगयाचिन्हे तयार करून विक्री करण्याच्या उद्देशाने ठेवलेला मुद्देमाल जप्त करण्यात आला.
याप्रकरणी सावंतवाडी वनविभागाने गुन्हा नोंदवला आहे. त्याला कुडाळच्या प्रथम वर्ग न्यायदंडाधिकारी न्यायालयात हजर केले असता, न्यायालयाने त्याला दोन दिवसांची वन कोठडी सुनावली. सदरची मोठी कारवाई उपवनसंरक्षक सावंतवाडी मिलीश शर्मा तसेच सहाय्यक वनसंरक्षक डॉ. सुनील लाड यांच्या मार्गदर्शनाखाली पार पडली. सिंधुदुर्ग जिल्हा निसर्गसंपन्न असून येथे बिबट्या, रानगवा, सांबर, खवलेमांजर, पिसोरी यांसारख्या संरक्षित वन्यजीवांचा अधिवास आहे. वन्यजीव संरक्षण अधिनियम 1972 नुसार या प्राण्यांची शिकार करणे, त्यांचे अवयव किंवा मृगयाचिन्हे बाळगणे अथवा त्यांचा व्यापार करणे हा गंभीर गुन्हा असून यामध्ये 7 वर्षांपर्यंत कारावास आणि आर्थिक दंडाची तरतूद आहे. अशा प्रकारचे बेकायदेशीर कृत्य आढळल्यास तात्काळ वनविभागाशी संपर्क साधावा, माहिती देणाऱ्याचे नाव गोपनीय ठेवले जाईल, असे आवाहन उपवनसंरक्षक मिलीश शर्मा यांनी केले आहे.