किल्ले रायगडावर प्रज्वलित होणार राज्य ऑलिम्पिकची क्रीडा ज्योत

| अलिबाग | प्रतिनिधी |
युगपुरुष छत्रपती शिवाजी महाराज यांचे स्फूर्तीस्थान असलेल्या राजधानी किल्ले रायगडावर शिवप्रभूना अभिवादन करुन राज्य ऑलिम्पिक स्पर्धेची क्रीडा ज्योत 4 जानेवारी 2023 रोजी सकाळी 9 वाजता प्रज्वलित केली जाणार आहे.

महाराष्ट्र शासन व महाराष्ट्र ऑलिम्पिक असोसिएशन यांच्या संयुक्त विद्यमाने दि 2 ते दि.12 जानेवारी 2023 या कालावधीत शिवछत्रपती क्रीडा संकुल, म्हाळुंगे-बालेवाडी, पुणे तसेच इतर जिल्ह्यांमध्ये राज्य ऑलिम्पिक क्रीडा स्पर्धांचे आयोजन करण्यात आले आहे. या स्पर्धेत एकूण 39 क्रीडा प्रकारांचा समावेश असून एकूण 10 हजार 546 खेळाडू, मार्गदर्शक, पंच सहभागी होणार आहेत. एकूण 39 क्रीडा प्रकारांपैकी 19 क्रीडा प्रकारांचे आयोजन हे शिवछत्रपती क्रीडा संकुल पुणे येथे होणार आहे. मुख्य क्रीडा ज्योत रॅली 4 जानेवारी, 2023 रोजी सकाळी 9 वा. किल्ले रायगड येथून सुरु होऊन पुणे येथे सायंकाळी 5 वाजेपर्यंत पुणे येथील शिवछत्रपती क्रीडा संकुल महाळूंगे येथे पोहोचणार आहे.

या मुख्य क्रीडा ज्योती रॅलीच्या आयोजनाकरिता जिल्हाधिकारी डॉ.महेंद्र कल्याणकर यांच्या अध्यक्षतेखाली जिल्हाधिकारी कार्यालय येथे नुकतीच बैठक संपन्न झाली. यावेळी महाराष्ट्र राज्य ऑलिम्पिक क्रीडा स्पर्धांचे जी.टी.सी.सी.सदस्य आणि क्रीडा ज्योत समन्वयक अमित गायकवाड पुणे आणि जिल्हा क्रीडा अधिकारी रायगड रविंद्र नाईक हे उपस्थित होते.

जिल्हा प्रशासनाकडून या मुख्य क्रीडा ज्योत रॅलीकरिता सर्वतोपरी सहकार्य केले जाईल. तसेच महाड उपविभागीय अधिकारी प्रतिमा पुदलवाड आणि महाडचे मुख्याधिकारी महादेव रोडगे यांनी या कार्यक्रमाच्या आयोजनासाठी आवश्यक सर्व परवानग्या तसेच इतर आवश्यक सुविधा तात्काळ उपलब्ध करून द्याव्यात. – डॉ.महेंद्र कल्याणकर,जिल्हाधिकारी

ज्योतीसोबत धावपटूंही धावणार
या मुख्य क्रीडा ज्योतीसोबत पुणे येथून 20 धावपटू येणार आहेत. तसेच रायगड जिल्ह्यातून देखील क्रीडापटू धावक सहभागी होतील तसेच इतर शाळा महाविद्यालयाचे विद्यार्थी या क्रीडा ज्योत मध्ये सहभागी होतील. आयोजन समिती मार्फत किल्ले रायगड येथे फुलांची सजावट करण्यात येणार आहे. मुख्य क्रीडा ज्योत रॅली रायगड येथून निघून ताम्हिणी घाटातून पुणे येथील शिव छत्रपती क्रीडा संकुल, म्हाळुंगे बालेवाडी येथे पोहोचेल.