मराठा समाजाकडून विद्यार्थी, पालकांचा गुणगौरव

| पनवेल | प्रतिनिधी |

सकल मराठा समाज मंडळ, खांदा कॉलनी यांच्यावतीने आयोजित विद्यार्थी-पालक गुणगौरव सोहळा 2025 मोठ्या उत्साहात मराठा भवन, सेक्टर 9 खांदा कॉलनी येथे संपन्न झाला. या कार्यक्रमात इयत्ता दहावी व बारावीमध्ये उत्तीर्ण झालेल्या गुणवंत विद्यार्थ्यांचा व त्यांच्या पालकांचा सन्मान करण्यात आला.

कार्यक्रमाची सुरुवात ‌‘गुरुमंत्र यशाचा’ या विशेष शैक्षणिक मार्गदर्शन सत्राने झाली, ज्याचे मार्गदर्शन प्रा. गिरीश चव्हाण (वर्धिष्ण फाऊंडेशन, खांदा कॉलनी) यांनी केले. त्यांनी विद्यार्थ्यांना यशाकडे नेणाऱ्या मार्गावर प्रेरणादायी विचार दिले. कार्यक्रमास प्रमुख उपस्थिती म्हणून विधान परिषदेचे आ. विक्रांत बाळासाहेब पाटील यांची उपस्थिती लाभली. मराठा समाजाचे नेते रामदास शेवाळे, रुपेश ठोंबरे यांनी देखील मराठा भवन कार्यालयात उपस्थित राहून गुणगौरव कार्यक्रमाचे कौतुक केले. सकल मराठा समाज मंडळ खांदा कॉलनी चे सल्लागार रामचंद्र ढोबळे, शिवाजी दांगट, अध्यक्ष संतोष जाधव, सचिव सदानंद शिर्के यांच्या हस्ते विद्यार्थ्यांना सन्मानचिन्ह, प्रशस्तीपत्र व पुष्पगुच्छ देऊन गौरवण्यात आले. विशेष प्राविण्य मिळवलेल्या विद्यार्थ्यांचादेखील विशेष सन्मान झाला. या उत्साही सोहळ्यास सकल मराठा समाज मंडळाचे सर्व सदस्य, पदाधिकारी व समाजबांधव, विध्यार्थी पालक वर्ग मोठ्या संख्येने उपस्थित होते.