नागरिकांच्या शुद्ध पाण्याचा प्रश्‍न मार्गी लागणार
| रायगड | खास प्रतिनिधी |
उमटे धरणातील गाळ काढण्याच्या कामाला प्रत्यक्षात शुक्रवारी प्रारंभ झाला. त्यामुळे आता 44 गावे आणि 33 आदिवासी वाडीवर नागरिकांच्या पिण्याच्या पाण्याचा प्रश्‍न मिटण्यास मदत मिळणार आहे. उमटे धरण संघर्ष ग्रुपने केलेल्या मागणीला शेकापने तातडीने प्रतिसाद दिल्याबद्दल नागरिकांनी आभार व्यक्त केले.
अलिबागचे माजी नगराध्यक्ष प्रशांत नाईक यांनी शुक्रवारी उमटे येथे भेट दिली. त्यांनी सुरु असलेल्या कामाची पाहणी केली. उमटे धरणातील गाळ कित्येक वर्ष काढण्यात आला नव्हता. त्यामुळे तालुक्यातील 44 गावासह 33 आदिवासीवाडीवरील नागरिकांना दुषीत पाण्याचा पुरवठा होत होता. याबाबत प्रशासनाकडे सातत्याने प्रश्‍न मांडण्यात आला. मात्र, प्रशासनाच्या उदासीन धोरणामुळे नागरिकांना अशुध्द पाण्याचा पुरवठा होत होता. महिलांना पाण्यासाठी भटकंती करावी लागत होती, तसेच येथील पर्यटन व्यवसायावर देखील विपरीत परिणाम होत असल्याने यातून मार्ग काढावा अशी विनंती उमटे धरण संघर्ष ग्रुप व परिसरातील स्थानिकांनी अनेक वर्षे शासनाकडे वारंवार विनंती केली होती. मात्र शेकापने यासाठी मदतीचा हात पुढे केला. (दि.17) मे रोजी उमटे धरण संघर्ष ग्रुप व स्थानिकांच्या एकजुटीने नारळ वाढवून गाळ काढण्याच्या कामाला सुरुवात करण्यात आली. कामाचा शुभारंभ उमटे परिसरातील जेष्ठ सामाजिक कार्यकर्ते अविनाश होळकर यांच्या हस्ते करण्यात आले. परिसरातील नागरिकांना ही नारळ वाढवण्याचा मान देण्यात आला.
शासनामार्फत धरणातील गाळ काढावा अन्यथा तो गाळ काढण्याची परवानगी सेंटर फॉर ट्रान्सफॉर्मिंग इंडिया या सामाजिक संस्थेला (सीएफटीआय) सीएसआर फंडातून परवानगी द्यावी, अशी मागणी शेकापच्या जिल्हा महिला आघाडी प्रमुख चित्रलेखा पाटील यांनी केली होती. त्यांच्या मागणीला यश आले. या कामाला शासकीय मान्यता मिळाली आणि अलिबागचे माजी नगराध्यक्ष प्रशांत नाईक यांच्या सहभागातून कामाला सुरुवात सुद्धा करण्यात आली. एकजुटीने कामाला सुरुवात झाल्यामुळे स्थानिकांमध्ये उत्साह दिसून आला. परिसरातील उद्योजकांनी गाळ काढण्यासाठी, पोकलेन, जेसीबी, डंपर व इतर उपकरणे उपलब्ध करून द्यावी असे आवाहन उमटे धरण संघर्ष ग्रुपचे पदाधिकारी नंदेश गावंड यांच्यासह नागरिकांनीही केली आहे.
उमटे धरणाचा गाळ काढण्यास सुरुवात होणे ही आमच्या विभागासाठी परिवर्तनाची नांदी आहे. शापित गाळमुक्त धरणासाठी एक पाऊल पुढे येऊन सहकार्य करावे. मा.चित्रलेखा पाटील व प्रशांत नाईक यांचे आभार मानतो. आमच्या अभियानाला मदत करणार्‍यांचे आम्ही स्वागत करतो.
अ‍ॅड. राकेश पाटील,
उमटे धरण संघर्ष ग्रुप
उमटे धरणाच्या पाण्यावरती अवलंबुन असणार्‍या स्थानिक नागरिकांनी आपल्या कुटुंबासमवेत एकदा तरी उमटे धरणाला सदिच्छा भेट देऊन धरणाची परिस्थिती आणि जनजागृती करण्यासाठी सहकार्य करावे
रुपेश पाटील,
स्थानिक तरुण उद्योजक