नवघर ग्रामस्थांच्या उपोषणाला यश

दुकान बदलण्याचा निर्णय
| पेण | वार्ताहर |
गेली वर्षभर रेशन दुकानदाराच्या विरुध्द नवघर ग्रामस्थ अर्ज विनवण्या करत होते. परंतु रेशन दुकान ज्या बचत गटाकडे होते त्या बचत गटाच्या अध्यक्षाचा पती अधिकारी वर्गाला चुकीची माहिती देऊन दिशाभूल करत होता. आणि अधिकारी वर्गदेखील त्यावर विश्‍वास ठेउन नवघर ग्रामस्थांची पिळवणूक करत होते. अखेर नवघर ग्रामस्थांनी प्रशासनाला लाक्षणिक उपोषणाचा इशारा देऊन मंगळवारी प्रांत कार्यालय येथे उपोषणाला सुरूवात केली. शेकडोंच्या संख्येने महिला प्रांत कार्यालयासमोर जमल्या. ‘धान्य आमच्या हक्काचे, नाही कुणाच्या बापाचे, भ्रष्टाचारी रेशन दुकानदाराला हटवा’ प्रांत कार्यालय परिसरात घोषणा देऊन परिसर दुमदुमला. सकाळी 10 च्या सुमारास उपोषणाला सुरूवात केली. महसूल खात्याकडे पोलिसांचा अहवाल जाताच महसुल खाते खडबडून जागे झाले आणि घटनास्थळी पोहचले.

यावेळी जमलेल्या महिलांनी आपली व्यथा सांगत रेशन दुकानदार कशाप्रकारे वर्तणूक करतो तसेच कमी वजनाचे धान्य देतो. महिलांना शिवीगाळ करतो. एक ना अनेक समस्या नायब तहसिलदार तथा पुरवठा अधिकारी सुरेश थळे यांच्यासमोर मांडल्या. पुरवठा अधिकार्‍यांनी देखील महिलांच्या सर्व समस्या ऐकून घेतल्या. त्यानंतर त्यांनी धान्य दुकान कशाप्रकारे बदलायचे याविषयी देखील उपोषणकर्त्यांबरोबर चर्चा केली. सदरील रेशन दुकानदाराच्या आलेल्या तक्रारींचा वरिष्ठांकडे तपशिल पाठवला जाईल व त्यावर वरिष्ठ योग्य ती कारवाई करतील असेही यावेळी पुरवठा अधिकार्‍यांनी सांगितले. येत्या दोन दिवसातच रेशन कार्डधारकांना रेशनिंग दुकान बदलुन दिले जाईल. मागील राहिलेले धान्य हे नवघर गावामध्ये पुरवठा शाखेचे अधिकारी व तलाठी एकत्र जाउन वाटतील. पुढच्या महिन्यापासुन धान्य दुकान क्र.10 मध्ये हे धान्य नवघर ग्रामस्थांना मिळेल. असेही यावेळी पुरवठा अधिकारी सुरेश थळे यांनी सांगितले. ही बाब उपोषण कर्त्यांना पटल्याने त्यांनी उपोषण मागे घेतले. या उपोषणाला पाटणोली गावचे माजी सरपंच नरेंद्रभाई पाटील, उपसरपंच सुरज पाटील, माजी उपसरपंच संजय म्हात्रे, किसान काँग्रेस जिल्हा अध्यक्ष सुर्यकांत पाटील आदिंनी सदिच्छा भेटदिली.