सुनेत्रा पवार राज्याचा पहिल्या महिला उपमुख्यमंत्री

। मुंबई । प्रतिनिधी ।

राज्याचे उपमुख्यमंत्री अजित पवार यांचे बारामती येथे बुधवारी (दि. 28) विमान अपघातात अकाली निधन झाले. अजित पवार यांच्या निधनानंतर महाराष्ट्राच्या राजकारणात मोठी पोकळी निर्माण झाली. त्यामुळे त्यांच्या निधनानंतर राज्याचा उपमुख्यमंत्री कोण होणार ? अशी चर्चा लगेचच सुरु झाली आणि या चर्चेत अजित पवार यांच्या पत्नी सुनेत्रा पवार यांचे नाव आघाडीवर होते. त्यानंतर अत्यंत वेगाने राष्ट्रवादी पक्षाच्या बैठका पार पडल्या व आज (दि. 31) संध्याकाळी 5 वाजता लोकभवनातील दरबार हाॅलमध्ये सुनेत्रा पवार यांनी उपमुख्यमंत्री पदाची शपथ घेतली.

अजित पवारांच्या निधनानंतर राज्यासह देशभरातून शोक व्यक्त केला जात आहे. या पार्श्वभूमीवर राष्ट्रवादी काँग्रेस पक्षाने महत्त्वाचा निर्णय घेत अजित पवार यांच्या पत्नी सुनेत्रा पवार यांची विधिमंडळ पक्षनेतेपदी निवड केली आहे. राष्ट्रवादीची गटनेतेपदाची महत्त्वपूर्ण बैठक विधीमंडळात पार पडली. या बैठकीत गटनेतेपदाचा प्रस्ताव मांडण्यात आला व हा प्रस्ताव एकमताने मंजूर करण्यात आला. त्यानुसार आज (दि. 31) संध्याकाळी 5:00 वाजता सुनेत्रा पवार यांचा शपथविधी सोहळा पार पडला. मर्यादित लोकांचा उपस्थितीतीत अत्यंत साधेपणाने शपथविधी सोहळा पार पडला. यावेळी सुनेत्रा पवार यांनी उपमुख्यमंत्री पदाची शपथ घेऊन महाराष्ट्रातील पहिल्या महिला उपमुख्यमंत्री ठरल्या आहेत.