बीडच्या अंबाजोगाईत भीषण अपघात; तिघांचा जागीच मृत्यू

| बीड | प्रतिनिधी |

अंबाजोगाई तालुक्यातील बर्दापूर-हातोला रस्त्यावर लिमगाव पाटीजवळ शनिवारी (दि.28) सायंकाळी साडेसातच्या सुमारास दोन दुचाकींची समोरासमोर जोरदार धडक झाली. या अपघातात तिघांचा मृत्यू झाला, तर एक तरुण गंभीर जखमी झाला आहे.

मिळालेल्या माहितीनुसार, बीड जिल्ह्यातील अंबाजोगाई तालुक्यातील बर्दापूर हातोला रस्त्यावर दोन दुचाकींची समोरासमोर भीषण धडक होऊन तिघांचा मृत्यू झाला आहे, तर एकजण गंभीर जखमी झाला आहे. लिमगाव पाटीजवळ शनिवारी रात्री साडेसातच्या सुमारास हा अपघात घडला. हा अपघात इतका भीषण होता की दोन्ही दुचाकींचा चक्काचुर झाला आहे. या अपघातात अभय चव्हाण रा. बर्दापूर याचा घटनास्थळीच मृत्यू झाला. तर समोरून येणाऱ्या दुचाकीवरील फारूख पठाण आणि नासीर शेख, दोघेही रा. पानगाव हे गंभीर जखमी झाले. त्यांना उपचारासाठी लातूरकडे नेत असताना वाटेतच त्यांचा मृत्यू झाला. या अपघातात ऋषिकेश चव्हाण हा तरुण गंभीर जखमी असून, त्याच्यावर अंबाजोगाईच्या स्वामी रामानंद तीर्थ शासकीय रुग्णालयात उपचार सुरू आहेत. अपघात इतका भीषण होता की दोन्ही दुचाकी पूर्णपणे नुकसानग्रस्त झाल्या. स्थानिकांनी घटनास्थळी धाव घेत तातडीने मदतकार्य सुरू केलं. अपघाताची माहिती मिळताच पोलीस घटनास्थळी दाखल झाले. त्यांनी पंचनामा करून पुढील तपास सुरू केला आहे.