जम्मू-काश्मीरमध्ये भीषण अपघात

बस दरीत कोसळून आठ ठार
अनेक जण गंभीर जखमी
। जम्मू । वृत्तसंस्था ।

जम्मू-काश्मीर डोडा येथे मिनीबस दरी पडल्याने आठ जणांचा मृत्यू झाला असून, अनेक जण गंभीर जखमी झाल्याची माहिती आहे. ही घटना थाथरीहून डोडाकडे जाताना घडली असल्याची प्राथमिक माहिती मिळत आहे.
सध्या घटनास्थळी बचावकार्याचे काम सुरु असून, जखमींना रुग्णालयात दाखल करण्यात आले आहे. केंद्रीय मंत्री डॉ. जितेंद्र सिंह यांनी डोडाच्या जिल्हाधिकारी विकास शर्मा यांच्यासोबत फोनवर घटनेबद्दल चर्चा केली असून, गंभीर जखमी झालेल्यांना डोडाच्या रुग्णालयात उपचारासाठी दाखल केले जात आहे.
चालकाचा बसवरील नियंत्रण सुटल्याने बस दरीत कोसळली असून, चिनाब नदीच्या पात्राजवळ ही घटना घडली आहे, अशी माहिती काही प्रत्यक्षदर्शिंनी दिली आहे. या घटनेत आतापर्यंत आठ जणांचा मृत्यू झाला असून, अनेक जण गंभीर आहेत. मृतांचा आकडा वाढण्याची शक्यता आहे. अपघातात बसचे अनेक भाग तुटले आहे. सध्या मोठ्या प्रमाणात बचावकार्य सुरु आहे.

पंतप्रधानांकडून शोक व्यक्त
पंतप्रधान नरेंद्र मोदी यांनी जम्मू-काश्मीरमध्ये घडलेल्या या घटनेबद्दल शोक व्यक्त केला आहे. ही घटना अत्यंत दुःखद आहे. या दुर्घटनेत मृत्युमुखी पडलेल्यांच्या कुटुंबियांप्रती मी संवेदना व्यक्त करतो. या अपघातात जखमी झालेल्यांना लवकरात लवकर बरे होण्यासाठी मी प्रार्थना करतो असे ट्विट मोदींनी केले आहे.