शेकाप प्रवक्त्या चित्रलेखा पाटील यांची माहिती
| अलिबाग | प्रतिनिधी |
शेतकऱ्यांच्या न्याय हक्कासाठी लढा देणारे स्व. नारायण नागू पाटील यांच्या नेतृत्वाखाली चरी या ठिकाणी संप पूकारण्यात आला होता. या संपाचा 93 वा वर्धापन दिन शुक्रवारी (दि.27) साजरा होणार आहे. संपातील शेतकऱ्यांच्या स्मृतींना उजाळा देण्यासाठी हा सोहळा एक वेगळ्या पध्दतीने होणार आहे. शेकाप नेते जयंत पाटील यांच्यासह दिग्गज मंडळींच्या प्रमुख उपस्थितीत हा सोहळा साजरा केला जाणार असून, या ऐतिहासिक संपाचे महत्व व त्याचा इतिहास आजच्या पिढीपर्यंत पोहचविण्याचा प्रयत्न राहणार असल्याची माहिती शेकाप प्रवक्त्या चित्रलेखा पाटील यांनी दिली. यावेळी शेकाप तालुका चिटणीस सुरेश घरत, गोरखनाथ पाटील, रविंद्र पाटील, प्रशांत पाटील, मंगेश पाटील, किरण पाटील, प्रा. डॉ. पराग पाटील, अभिषेक पाटील आदी पदाधिकारी, कार्यकर्ते उपस्थित होते.
सावकारांच्या मगरमिठीत सापडलेल्या शेतकऱ्यांना जागे करण्याचे काम स्व. नारायण नागू पाटील तसेच भारतीय राज्य घटनेचे शिल्पकार डॉ. बाबासाहेब आंबेडकर यांनी केले. कसेल त्याची जमीन हा कुळ कायदा या संपामुळे संमत झाला. नारायण नागू पाटील यांच्या प्रभावशाली नेतृत्वास अभिवादन करण्यासाठी आणि शेतकऱ्यांच्या संघर्षाच्या स्मृतींना उजाळा देण्यासाठी यंदाहा चरी संपाचा वर्धापन दिन चरी या ठिकाणी साजरा केला जाणार आहे. यावर्षी सकाळी शाळेतील विद्यार्थ्यांमार्फत प्रभातफेरी काढण्यात येणार आहे. त्यानंतर स्मारक पूजन, स्वागत, प्रास्ताविक, मान्यवरांची भाषणे, खारेपाटातील स्थानिक कलाकांराद्वारे कला पथकाचे सादरीकरण, शेतकऱ्यांना शेती अवजारे वाटप तसेच शाळेतील मुले व मुलींना सायकल वाटपाचा कार्यक्रम या निमित्ताने होणार आहे. सकाळी नऊ वाजल्यापासून सुरु होणारा हा कार्यक्रम संध्याकाळपर्यंत असणार आहे.
चरीच्या संपामुळे देशातील शेतकऱ्यांना त्यांचे हक्क मिळाले आहेत. त्यामुळे या संपाचे महत्व आजच्या पिढीपर्यंत पोहचविण्यासाठी एक भव्यदिव्य असा कार्यक्रम घेतला जाणार आहे. या कार्यक्रमाला जिल्ह्यातील नागरिक, शेतकरी, व सर्व घटकातील मंडळींनी उपस्थिती राहवे असे आवाहन शेकाप प्रवक्त्या चित्रलेखा पाटील यांनी केले.
स्मारकाच्या जागेसाठी सहा महिन्याचा अल्टीमेटम
चरी येथे शेतकऱ्यांनी एकत्र येत सावकाराविरोधात लढा पुकारला. 1932 पासून सुरु झालेला हा संप 1939 ला संपला. तब्बल 7 वर्षे अन्नाचा एकही कण न पिकवता हा संप पुकारला होता. चरी हे संपाचे केंंद्र बिंदू होते. या संपात चरी परिसरातील 14 गावे सहभागी झाले होते. साधापरपणे 767 एकर जमीन पिकविण्याचे थांबले होते. प्रदिर्घ काळ चाललेल्या या संपाने सरकाराला कायदा करण्यास भाग पाडले. अलिबाग तालुक्यातील केंद्र बिंदू असलेल्या चरीच्या संपाने संपुर्ण देशातील शेतकऱ्यांना त्यांचा हक्क मिळवून दिला. चरी येथे स्मारक उभारले जाणार आहे, जागेचा प्रश्न प्रलंबित आहे. सरकारसह प्रशासनाला सहा महिन्याचा अल्टीमेटम दिला जात आहे. सहा महिन्यात जागेचा प्रश्न सोडविण्यात यावा, अन्यथा यासाठी रस्त्यावरउतरले जाईल,असा इशारा चित्रलेखा पाटील यांनी दिला.
स्थानिक, शेतकऱ्यांचा विचार करून प्रकल्प उभारावे- चित्रलेखा पाटील
शेतकरी कामगार पक्ष शेतकऱ्यांच्या पाठीशी कायमच ठाम उभा आहे. शेतकऱ्यांचे नेते, स्व. नारायण नागू पाटील यांच्याकडून मिळालेल्या प्रेरणेतूनच शेतकऱ्यांच्या न्याय हक्कासाठी शेकाप लढत आहे. सध्या कार्पोरेट खोती उद्यास आली आहे. यांच्या मार्फत शेतकऱ्यांची पिळवणूक होत आहे. प्रकल्पाला कधीही विरोध नाही. परंतु शेतकरी, तेथील पर्यावरणाचा विचार करून प्रकल्प आणणे गरजेचे आहे. प्रकल्प उभारत असताना त्यापुर्वी स्थानिकांना रोजगार मिळेल,अशा पध्दतीने कौशल्य विकासाचे उपक्रम राबविणे गरजेचे आहे. शेतकऱ्यांना विश्वासात घेऊनच प्रकल्प उभे केले पाहिजे. टोरंट प्रकल्पाबाबत शेतकरी, स्थानिक यांना विश्वासात घेऊन निर्णय सरकारने घेणे गरजेचे आहे. झाडे जगली पाहिजेत, जनसुनावण्या योग्य पध्दतीने होणे अपेक्षित आहे. प्रकल्प उभारत असताना तंत्रज्ञानाचा वापर होतो, मात्र देशातील नागरिकांना रोजगार मिळावा, यासाठीदेखील प्रयत्न होणे गरजेचे आहे.






