पडद्यावरील चित्रपटाचा क्रेझ कायमच

महाजने-दिवीवाडीतील ग्रामस्थांनी जपली परंपरा

| रायगड | जिल्हा प्रतिनिधी |

डिजिटलच्या युगातही मोठ्या पडद्यावरील चित्रपट पाहण्याची परंपरा कायम असल्याचे दिसून आले आहे. अलिबाग तालुक्यातील महाजने येथील दिवीवाडीमधील आदिवासी ग्रामस्थांनी ही परंपरा जपली आहे. त्यामुळे या रुपेरी पडद्यावरील चित्रपटाची क्रेझ कायम असल्याचे दिसून येत आहे.

पूर्वी मनोरंजनाची फारशी साधने नव्हती. सण, उत्सव, वाढदिवस इत्यादी कार्यक्रमांच्या निमित्ताने मनोरंजन म्हणून रुपेरी पडद्यावर चित्रपट बघितला जात होता. आजूबाजूच्या गावांतील मंडळी दोन ते पाच किलोमीटर पायी अथवा, सायकलने प्रवास करत या पडद्यावरील चित्रपट पाहण्यासाठी येत होते. पडद्यावरील चित्रपट अगदी जवळून पाहता यावा, तसेच बसण्यासाठी जागा मिळावी, म्हणून पूर्वी अनेकजण दोन ते तीन तास अगोदरच त्या ठिकाणी पोहोचत असत. काही जण कुटुंबासमवेत, तर काही जण मित्रमंडळींसमवेत पडद्यावरील चित्रपट पाहण्यासाठी येत असत. रुपेरी पडद्यावरील चित्रपट पूर्वी गावागावात चालविला जात होता. त्यामुळे एक वेगळा आनंद यातून निर्माण होत असत. मराठी, हिंदी चित्रपटातील अभिनेता, अभिनेत्रीच्या ॲक्शन, रोमॅंटीक सीन बघण्याचा आनंद अनेकजण लुटत होते. परंतु, गावागावातील पडद्यावरील चित्रपट बघण्याचा मागील काही वर्षांपासून कमी होऊ लागला आहे. घरबसल्या युट्युब, हॉट स्टारमार्फत मोबाईल, टॅबवर चित्रपट बघण्याचा क्रेझ वाढला आहे.

वाढत्या तंत्रज्ञानामुळे पडद्यावरील चित्रपट लावण्याचे प्रमाणही कमी झाले. मोबाईल एका क्लीकवर कधीही कुठेही आवडता चित्रपट व मनोरंजनाचे कार्यक्रम बघण्याची व्यवस्था झाली. त्याचा परिणाम रुपेरी पडद्यावरील चित्रपटावरही झाला. मात्र, अलिबाग तालुक्यातील महाजने येथील दिवीवाडी याला अपवाद ठरली आहे. दरवर्षी धार्मिक कार्यक्रमाच्या निमित्ताने आदिवासी ग्रामस्थांच्यावतीने पडद्यावर चित्रपट दाखविला जात आहे. गेल्या अनेक वर्षांपासूनची ही परंपरा आजही जपली जात आहे. नुकत्याच काही दिवसांपूर्वी आदिवासी ग्रामस्थांच्या वतीने पडद्यावर मराठीसह हिंदी चित्रपट दाखविण्यात आला. मात्र, यावेळेला रोलवर चित्रपट नव्हता, तर तो चित्रपट प्रोजेक्टवर आधुनिकतेचा आधार घेत दाखविण्यात आला. हा चित्रपट पाहण्यासाठी आदिवासी ग्रामस्थांसह महिला व आजूूबाजूच्या गावांतील नागरिक, तरुणांनी गर्दी केली होती. त्यामुळे आजच्या डिजिटल युगातही पडद्यावरील चित्रपट तग धरून असल्याचे दिसून आले आहे.