। पनवेल । वार्ताहर ।
सिम कार्ड ब्लॉक झाल्याचे सांगून केवायसी अपडेट करण्याच्या बहाण्याने सायबर गुन्हेगारांनी पनवेल भागात राहाणार्या एका महिला डॉक्टरला मोबाइल फोनवर एनी डेस्क हे अॅप डाऊनलोड करण्यास सांगून त्याद्वारे त्यांच्या बँक खात्यातून तीन लाख 60 हजारांची रक्कम परस्पर काढून घेतल्याचा प्रकार उघडकीस आला आहे. या सायबर गुन्हेगाराविरोधात खांदेश्वर पोलिसांनी फसवणुकिचा गुन्हा दाखल केला आहे.
या प्रकरणात फसवणूक झालेल्या महिला डॉक्टर स्त्रीरोगतज्ज्ञ असून त्यांचे पतीदेखील डॉक्टर आहेत. या डॉक्टर पती-पत्नीचे नवीन पनवेल भागात रुग्णालय आहे. एका सायबर चोराने या महिला डॉक्टरच्या मोबाइलवर मेसेज पाठवून त्यांचे व्होडाफोनचे सिम कार्ड ब्लॉक झाल्याचे व या सिम कार्डचे केवायसी अपडेट करण्यासाठी मोबाइल नंबर पाठवून दिला. त्यामुळे डॉक्टरने मोबाइल नंबरवर संपर्क साधल्यानंतर समोरील सायबर गुन्हेगाराने केवायसी अपडेट करण्यासाठी त्यांना ऑनलाइन 10 रुपये पाठविण्यास सांगिलते. मात्र डॉक्टर ऑनलाइन पेमेंटसाठी कोणत्याही प्रकारचे अॅप्लिकेशन वापरत नसल्याने त्यांनी मुलीच्या मोबाइलवरून पैसे पाठवित असल्याचे सायबर गुन्हेगाराला सांगितले.
त्यानंतर सायबरचोराने सांगितल्यानुसार डॉक्टर महिलेने मोबाइलवर एनी डेस्क अॅप्लिकेशन डाऊनलोड केले. हे अॅप्लिकेशन उघडल्यानंतर अर्ध्या तासाने सायबर गुन्हेगाराने सांगितल्यानुसार महिला डॉक्टरने 11 रुपये ऑनलाइन पेमेंट केले. त्यानंतर सायबर गुन्हेगाराने प्रोसेस पूर्ण झाल्याचे सांगून फोन बंद केला. मात्र सायंकाळी महिला डॉक्टरच्या खात्यातून 89,999 रुपये दुसर्या खात्यात वळते झाल्याचा मेसेज त्यांच्या मोबाइलवर आला. त्यामुळे त्यांनी तात्काळ बँकेच्या कस्टमर केअरवर संपर्क साधून बँकेकडून घेतलेली नेट बँकिंग सेवा बंद करण्यास सांगितले.
मात्र तोपर्यंत सायबर गुन्हेगारांनी त्यांच्या खात्यातून 90 हजारांचे तीन व्यवहार होऊन सर्व पैसे दुसर्या खात्यात वळते केले. त्यानंतर सायबरचोरांकडून फसवणूक झाल्याचे महिला डॉक्टरच्या लक्षात आल्यानंतर त्यांनी खांदेश्वर पोलिस ठाण्यात तक्रार दाखल केली.