अलिबागच्या नव्या स्थानकाचे स्वप्न अपूर्णच

एसटी महामंडळाचा दिखावा कायमच
भूमीपूजन होऊन आठ वर्षे होत आली, तरी कामाचा अभाव

| रायगड | प्रमोद जाधव |

अलिबाग बस स्थानकाच्या नुतनीकरणाचा मोठा थाट एसटी महामंडळाने केला होता. कामाचे भूमीपूजन होऊन आठ वर्षे होत आली आहेत; मात्र अद्यापर्यंत त्या जागी साधी वीटही रचण्यात आली नाही. त्यामुळे नव्या स्थानकाचे स्वप्न अपूर्णच राहिले असून एसटी महामंडळाचा दिखावा यातून समोर आला आहे.

रायगड जिल्ह्यामध्ये एसटी महामंडळ रायगड विभाग नियंत्रकांच्या अखत्यारित अलिबाग, पेण, कर्जत, रोहा, महाड, माणगाव, श्रीवर्धन, मुरूड हे आठ एसटी बस आगार आहेत. या आगारांमध्ये अलिबाग हे आगार जिल्ह्याच्या मध्यवर्ती ठिकाणी आहे. प्रवाशांच्या सेवेसाठी 1 एप्रिल 1961 मध्ये अलिबाग एसटी बस आगार व स्थानक उभारण्यात आले. सर्व्हे नंबर 778, 1298 असलेल्या जागेचे एकूण क्षेत्रफळ 19 हजार 530 चैा. मी. आहे. त्यामध्ये आगाराचे क्षेत्रफळ 11 हजार चैा. मीटर,बस स्थानकाचे क्षेत्रफळ 7 हजार 630 चैा. फुट आणि आगार निवासस्थानाचे क्षेत्रफळ 900 चैा. फुट इतके आहे. या आगारातून लाखो प्रवासी प्रवास करतात. 65 वर्षे तीन महिने जून्या असलेल्या या स्थानकाची अवस्था दयनीय झाल्याने नवीन स्थानक उभारण्याची हालचाल आठ वर्षापुर्वी सुरु झाली होती. त्यावेळी 28 ऑगस्ट 2018 मध्ये नवीन स्थानकाच्या कामाचे भूमीपूजन करण्यात आले होते. मोठ्या थाटामाटात सायंकाळच्या सुमारास भर पावसात भूमीपूजन झाले.

पुणे येथील डिरोक्ट्रीक इंजिनिअरिंग या कंपनीकडून 2019 मध्ये माती परिक्षण करण्यात आले. 18 महिन्यात म्हणजे 21 सप्टेंबर 2021 पर्यंत स्थानकाचे काम पूर्ण होण्याची अपेक्षा होती. मात्र सहा कोटी 28 लाख रुपये खर्च अपेक्षीत असलेल्या नव्या एसटी बस स्थानकांचे काम अडकून राहिले आहे. गेल्या आठ वर्षापासून साधी वीटही या जागेत बसविली नाही. सात हजार 630 चैारस फुट इतक्या क्षेत्रावर नवीन स्थानकाचे बांधकाम करण्यात येणार होते. तळ मजला व पहिला मजला अशा पध्दतीने बस स्थानकामध्ये इमारत होणार होती. स्थानकातील तळ मजल्यामध्ये 14 फलाट असणार होते. प्रवाशांसाठी खास प्रतिक्षालय, उपहारगृह, प्रसाधनगृह, पार्सल खोली, महिलांसाठी हिरकणी कक्ष, आरक्षण कक्ष, स्थानक प्रमुख कार्यालय होणार होते. पहिल्या मजल्यावर चालक व वाहकांसाठी विश्रांती कक्ष बांधण्यात येणार होते. त्यामध्ये महिला व पुरुषांसाठी वेगळे कक्ष असणार होते. सुमारे एक लाख प्रवासी ये-जा करण्याची क्षमता नव्या स्थानकात होती. परंतू महामंडळाच्या उदासीनतेमुळे नव्या स्थानकाचे स्वप्न आता अपूर्णच राहिल्याचे चित्र आहे.

अलिबाग स्थानक समस्यांच्या गर्तेत
नोकरी व्यवसायानिमित्त अलिबागमध्ये येणाऱ्यांची संख्या प्रचंड आहे. अलिबाग आगारातून दिवसाला 20 हजार पेक्षा अधिक प्रवासी प्रवास करतात. सुमारे 19 हजार किलो मीटर अंतर एसटी बस नियमीत ये-जा करते. याच अलिबाग आगाराची अवस्था दयनीय आहे. सतत स्लॅब कोसळणे, कार्यालयात पाणी शिरणे,अस्वच्छतेचा बोजवारा, स्थानकाला तळ्याचे स्वरुप, ठिकठिकाणी खड्डयाचे साम्राज्य,एसटीला गळती अशा अनेक समस्यांच्या गर्तेत अलिबाग स्थानक सापडले आहे.