जेएसएम महाविद्यालयात ‌‘उन्मेष’चा उत्साह

विविध सांस्कृतिक कार्यक्रम, स्पर्धांचे आयोजन

| अलिबाग | प्रतिनिधी |

जेएसएम महाविद्यालयाचे सांस्कृतिक कार्यक्रम, संगीत, नृत्य, नाट्य, विविध स्पर्धा व डेज यांनी नटलेले वार्षिक स्नेहसंमेलन अर्थात ‌‘उन्मेष 2025′ उत्साहात संपन्न झाले. जेएसएम महाविद्यालयात वार्षिक स्नेहसंमेलनाच्या निमित्ताने विविध सांस्कृतिक कार्यक्रम व स्पर्धांचे आयोजन करण्यात आले होते. यादरम्यान, सोमवारी (दि.22) पार पडलेल्या विविध स्पर्धांचे उद्घाटन जनता शिक्षण मंडळाचे अध्यक्ष ॲड. गौतम पाटील यांच्या हस्ते करण्यात आले. तर, विविध सांस्कृतिक कार्यक्रमाचे उद्घाटन नवनिर्वाचित नगरसेवक व जनता शिक्षण मंडळाच्या उपाध्यक्षा डॉ. साक्षी पाटील यांच्या हस्ते करण्यात आले.

या सांस्कृतिक कार्यक्रमातील संगीत, नृत्य, नाट्य या विविध कार्यक्रमांत पारितोषिक प्राप्त केलेल्या व उत्कृष्ट सादरीकरण केलेल्या विद्यार्थ्यांना मान्यवरांच्या हस्ते प्रमाणपत्र व पदक देऊन सन्मानित करण्यात आले. या स्नेहसंमेलनाच्या पारितोषिक वितरण सोहळ्यासाठी प्रमुख पाहुणे म्हणून नवनिर्वाचित नगरसेवक अनिल चोपडा यांच्यासह प्राचार्या डॉ. सोनाली पाटील, उपप्रचार्य डॉ. प्रविण गायकवाड, स्नेहसंमेलन कार्याध्यक्ष डॉ. निळकंठ शेरे, उपकार्याध्यक्ष संगीता गाढे, पर्यवेक्षक अजय सावंत व ॲड. सचिन जोशी उपस्थित होते. तसेच, रोझ डे, चॉकलेट डे, साडी डे, टाय डे, ट्रॅडिशनल डे असे विविध डेज साजरे करण्यात आले. दरम्यान, ट्रॅडिशनल डेच्या निमित्ताने एनएसएसच्या विद्यार्थ्यांनी पारंपारीक वेशभूषा करून ढोल ताशाच्या गजारात आई एकविरा देवीची पालखी मिरवणूक काढण्यात आली.

वार्षिक स्नेहसंमेलन उन्मेष-2025 चे यशस्वीरित्या आयोजन करण्यासाठी स्नेहसंमेलन कार्याध्यक्ष डॉ. निळकंठ शेरे, उपकार्याध्यक्ष संगीता गाढे, जिल्हा सांस्कृतिक समन्वयक प्रा. जयेश म्हात्रे, सांस्कृतिक समिती प्रमुख प्रा. श्वेता पाटील, प्रा. सिमंतीनी ठाकूर, सर्व सदस्य, संयोगी नाईक, सर्व प्राध्यापक, शिक्षक, शिक्षकेतर कर्मचारी व विद्यार्थी यांनी विशेष परिश्रम घेतले.

स्नेहसंमेलन कलाकार घडविण्याचे व्यासपीठ
कार्यक्रमाचे अध्यक्ष ॲड. गौतम पाटील यांनी आपले मनोगत व्यक्त करताना सांगितले की, जे.एस.एम. महाविद्यालय हे नेहमी विद्यार्थ्यांच्या कलागुणांना वाव देण्यासाठी अग्रेसर असते. या वार्षिक स्नेहसंमेलनाच्या माध्यमातून अनेक विद्यार्थी आपले कलाविष्कार सादर करतात. त्यामुळे हे स्नेहसंमेलन म्हणजे कलाकार घडविण्याचे एक उत्कृष्ट व्यासपीठ आहे, असे मत त्यांनी व्यक्त केले. तसेच, यशस्वी विद्यार्थ्यांचे अभिनंदन करून शुभेच्छा दिल्या.