आरडीसीसीच्या शिरपेचात मानाचा तुरा

संस्थांचे संगणकीकरण करणारी देशातील पहिली जिल्हा मध्यवर्ती बँक!

। अलिबाग । प्रतिनिधी ।

ग्रामीण भागात काम करणार्‍या विविध कार्यकारी सेवा सहकारी संस्थेचे कामकाज गतिमान व पारदर्शक व्हावे, यासाठी देशपातळीवर संस्थांचे संगणकीकरण करण्याचा उपक्रम हाती घेतला. रायगड जिल्हा मध्यवर्ती सहकारी बँकेने मोठ्या उत्साहाने संस्थाचे संगणकीकरणाचे काम सक्षमपणे पूर्ण केले. हे उपक्रम राबविणारी रायगड जिल्हा मध्यवर्ती सहकारी बँक देशातील एकमेव बँक ठरली असून, जयंत पाटील यांच्या नेतृत्वाखाली करण्यात आलेली कामगिरी खर्‍या अर्थाने कौतुकास्पद आहे, असे गौरवोद्गार नाबार्डचे चेअरमन शाजी के.व्ही. यांनी काढले. विविध कार्यकारी सेवा सहकारी संस्थांचा संगणकीकरण कार्यपूर्ती सोहळा शुक्रवारी (दि.11) अलिबागमध्ये आयोजित करण्यात आला होता. यावेळी ते बोलत होते.

यावेळी रायगड जिल्हा मध्यवर्ती सहकारी बँकेचे चेअरमन जयंत पाटील, व्हाईस चेअरमन सुरेश खैरे, राज्य सहकार निवडणूक आयुक्त अनिल कवडे, नाबार्डचे सीजीएम संजयकुमार गुप्ता, सीजीएम रश्मी दराड, लेखापरीक्षण विभागाचे अपर निबंधक राजेश जाधवर, रत्नागिरी जिल्हा मध्यवर्ती सहकारी बँकेचे उपाध्यक्ष बाबाजी जाधव, आमदार किशोर दराडे, माजी आमदार दत्तात्रेय सावंत, नाबार्डचे जनरल मॅनेजर प्रदीप पराते, जिल्हा उपनिबंधक प्रमोद जगताप, जिल्हा विशेष लेखा परीक्षक यू.जी. तुपे, प्रदीप अपसुंदे, माजी मुख्य कार्यकारी अधिकारी प्रदीप नाईक, संस्थाचे ज्येष्ठ पदाधिकारी शंकरराव म्हात्रे, ठाणे जिल्हा बँकेचे मुख्य कार्यकारी अधिकारी अरुणकुमार गोंधळी, आदर्श नागरी पतसंस्थेचे संस्थापक अध्यक्ष सुरेश पाटील, कमळ नागरी सहकारी पतंस्थेचे संस्थापक अध्यक्ष गिरीश तुळपुळे, कामरान शेख, इमरान अन्सारी, बँकेच सर्व संचालक, विविध कार्यकारी सेवा सहकारी संस्थांचे पदाधिकारी, सदस्य, महिला वर्ग व बँकेतील कर्मचारी मोठ्या संख्येने उपस्थित होते. या कार्यक्रमाचे सूत्रसंचालन संदीप जगे यांनी, तर आभार बँकेचे व्हाईस चेअरमन सुरेश खैरे यांनी व्यक्त केले.

याप्रसंगी शाजी के. व्ही यांनी सांगितले, विविध कार्यकारी संस्थांचे कामकाज पारदर्शक करण्यासाठी संगणकीकरणाचा उपक्रम हाती घेतला. संगणकीकरणामुळे कामकाजात अमूलाग्र बदल होऊन ते कामकाज अधिक गतिमान होण्यास मदत होणार आहे. राज्यासह देशातील सर्व संस्थांचे एकत्रीकरण करण्याचा उद्देश समोर ठेवून काम केले आहे. खेड्यापाड्यात वेगवेगळे उपक्रम राबवून गावे आर्थिकदृष्ट्या सक्षम करण्याचा प्रयत्न केला आहे. गावातील प्रगती अधिक गतिमान व्हावी या अपेक्षेतून हा उपक्रम राबविण्यात आला. रायगड जिल्हा बँकेने खूप चांगल्या पद्धतीने या उपक्रमात सहभाग घेऊन संस्था संगणकीकरण करण्यामध्ये बहुमान मिळवला आहे. त्यामुळे जिल्हा बँकेतील चेअरमन, संचालक, कर्मचारी यांचे अभिनंदन करण्यात येत आहे. भविष्यात आणखी वेगळ्या पद्धतीने उपक्रम राबविण्याचा प्रयत्न राहणार आहे. ग्रामीण भागातील 30 टक्के मंडळी शहरात व 70 टक्के मंडळी गावांमध्ये राहात आहेत. या गावांतील जनतेला उत्पन्नाचे साधन खुले व्हावे यासाठी जिल्हा बँकेच्या माध्यमातून वेगवेगळे उपक्रम सुरु केले जाणार आहेत. शेतकर्‍यांनी तयार केलेल्या मालाला चांगला भाव मिळावा, शेतकरी आर्थिकदृष्ट्या सक्षम करण्यासाठी पाऊल उचलण्यात आले आहे, असे शाजी म्हणाले.