चाऱ्याच्या दराने शेतकरी हैराण; जनावरे विकण्याची वेळ
| सोलापूर | प्रतिनिधी |
पावसाने पाठ फिरवल्याने सोलापूर जिल्ह्यात दुष्काळाची दाहकता वाढू लागली आहे. अनेक भागांत खरीप पिके करपली असून जनावरांच्या चारा-पाण्याचा प्रश्न गंभीर बनला आहे. शेतीसोबत दुग्ध व्यवसायावर अवलंबून असलेल्या शेतकऱ्यांसमोर पशुधन जगवायचे कसे, असा प्रश्न निर्माण झाला आहे.
जिल्ह्यात यंदा पावसाची मोठी तूट झाली असून, अनेक भागांत पावसाने दीर्घ खंड दिला आहे. त्यामुळे शेतातील हिरवा चारा संपत चालला आहे. उपलब्ध मक्याच्या चाऱ्याचा दर सुमारे सहा हजार रुपये टन, तर उसाच्या चाऱ्याचे दरही पाच हजार रुपये टनापर्यंत गेल्याचे सांगण्यात येत आहे. चाऱ्याचे दर वाढल्याने जनावरांचे संगोपन करणे शेतकऱ्यांच्या आवाक्याबाहेर जात आहे.
पंढरपूर भागातून सांगोला, मंगळवेढा, माढा, करमाळा आदी भागांत चारा नेला जात आहे. मात्र, मागणीच्या तुलनेत उपलब्धता कमी असल्याने काही शेतकऱ्यांना चारा मिळणेही कठीण झाले आहे. दूध व्यवसायातून घरखर्च भागवणाऱ्या पशुपालकांचे दूध उत्पादन घटत असून, खर्च मात्र वाढत आहे. त्यामुळे काही शेतकऱ्यांसमोर नाइलाजाने पशुधन विकण्याची वेळ येत आहे.
पिण्याच्या पाण्यासाठी अनेक गावांमध्ये टँकरचा आधार घ्यावा लागत असून, जनावरांच्या पाण्याचा प्रश्नही गंभीर आहे. पिके वाचली नाहीत, चारा महागला आणि पाणी मिळेनासे झाले तर शेतकऱ्याने जनावरे जगवायची कशी? असा सवाल पशुपालकांकडून उपस्थित केला जात आहे. दरम्यान, सीमावर्ती भागात कृत्रिम पावसाचा प्रयोग करण्याची मागणी शेतकऱ्यांकडून होत आहे. मात्र त्यासोबतच सरकारने तातडीने चारा डेपो सुरू करावेत, जनावरांसाठी पाण्याची व्यवस्था करावी आणि नुकसानग्रस्त शेतकऱ्यांना मदत द्यावी, अशी मागणी होत आहे. दुष्काळ केवळ शेतातील पीक जाळत नाही; तो शेतकऱ्याच्या गोठ्यातील पशुधनही हिरावून घेतो. सरकारने आता बैठका आणि घोषणांपलीकडे जाऊन प्रत्यक्ष चारा-पाणी उपलब्ध करून देण्याची गरज आहे.