48 तासांत उमेदवाराचा गुन्हेगारी रेकॉर्ड होणार प्रसिद्ध

48 तासांत उमेदवारांचे क्रिमिनल रेकॉर्ड प्रसिद्ध करा
नवी दिल्ली | वृत्तसंस्था |
राजकारणातून गुन्हेगारी हद्दपार करण्याच्या दृष्टीने सर्वोच्च न्यायालयाने महत्वाचा आदेश दिला आहे. सर्वच राजकीय पक्षांनी उमेदवारांची निवड होताच पुढील 48 तासांत त्यांचा गुन्हेगारी रेकॉर्ड प्रसिद्ध करण्याचे आदेश सर्वोच्च न्यायालयाने दिला आहे. न्यायमूर्ती आर.एफ.नरिमन आणि बी.आर.गवई यांच्या खंडपीठाने यापूर्वी 13 फेब्रुवारी 2020 मध्ये देण्यात आलेल्या आदेशात बदल केले आहेत.

सर्वोच्च न्यायालयाने गेल्या महिन्यात गुन्हेगारांना राजकारणात येण्यापासून रोखण्याासठी आणि निवडणुकीला उभं राहण्यापासून रोखण्यासाठी विधिमंडळ काहीही करण्याची शक्यता नाही असं म्हटलं होतं. 2020 च्या आदेशात बिहार विधानसभा निवडणुकीच्या पार्श्‍वभूमीवर सर्वोच्च न्यायालयाने उमेदवारांनी निवड झाल्यानंतर 48 तासात किंवा किमान उमेदवारी अर्ज भरण्याच्या दोन आठवडे आधी ही माहिती अपलोड करावी असा आदेश दिला होता. निवड झाल्यानंतर 72 तासांच्या आत अनुपालन अहवाल निवडणूक आयोगाला सादर करावा लागणार आहे. आपल्या उमेदवारांवर दाखल गुन्हेगारांची माहिती जाहीर न करणार्‍या राजकीय पक्षांविरोधात कारवाईची मागणी करणारी याचिका सर्वोच्च न्यायालयात दाखल करण्यात आली आहे. कोर्टाचा अवमान केल्याप्रकरणी ही कारवाई करण्याची मागणी करण्यात आली असून सुनावणीदरम्यान सर्वोच्च न्यायालयाने हा आदेश दिला.