चिंचवली डिकसळमध्ये डोंगर पोखरला

महसूल प्रशासनाकडून जाणीवपूर्वक दुर्लक्ष

| नेरळ | प्रतिनिधी |

कर्जत तालुक्यातील चिंचवली डिकसळ येथे परवानगीच्या पलीकडे मोठ्या प्रमाणात माती उत्खनन सुरू असून, महसूल प्रशासनाने जाणीवपूर्वक दुर्लक्ष केल्याचा गंभीर आरोप पर्यावरणप्रेमींकडून करण्यात आला आहे.

तालुक्यातील चिंचवली डिकसळ परिसरात पाली भूतिवली धरणाला संरक्षण देणारी टेकडी मोठ्या प्रमाणावर फोडली जात असून, हा प्रकार बेकायदेशीरपणे सुरू असल्याचा आरोप स्थानिक आणि पर्यावरणप्रेमींकडून करण्यात येत आहे. विशेष म्हणजे, या सर्व घडामोडींवर महसूल प्रशासन गप्प असल्याने संशय अधिक गडद झाला आहे.

मिळालेल्या माहितीनुसार, संबंधित शेतकऱ्यांनी केवळ 300 ते 500 ब्रास माती उत्खननाची परवानगी घेतली आहे. मात्र, प्रत्यक्षात दररोज शेकडो ब्रास माती काढून हजारो ब्रास मातीचा उपसा करण्यात येत असल्याचा आरोप आहे. ही माती कर्जत रेल्वे कारशेड प्रकल्पासाठी भराव म्हणून वापरली जात असल्याचेही सांगितले जात आहे.

डोंगरफोडीमुळे परिसरातील नैसर्गिक रचना पूर्णपणे बदलली असून, पावसाच्या पाण्याचा नैसर्गिक नाला बंद करण्यात आल्याचा गंभीर आरोप आहे. यामुळे आगामी पावसाळ्यात पाणी थेट कर्जत-कल्याण मार्गावर तसेच स्थानिकांच्या घरात घुसण्याची भीती व्यक्त होत आहे. या भागात मोठ्या प्रमाणावर आढळणाऱ्या राष्ट्रीय पक्षी मोरांचे अधिवासही धोक्यात आले असून, झाडांची तोड आणि डोंगर सपाटीकरणामुळे जैवविविधतेचा ऱ्हास होत आहे. मात्र एवढे गंभीर परिणाम होत असतानाही महसूल विभागाकडून कोणतीही ठोस कारवाई होत नसल्याने संताप व्यक्त होत आहे.

पर्यावरणप्रेमींनी या प्रकरणाची सखोल चौकशी करून उत्खननाचे पंचनामे करावेत आणि दोषींवर कठोर कारवाई करावी, अशी मागणी केली आहे. अन्यथा, हा प्रकार शासनाची फसवणूक असल्याचा आरोप करत वरिष्ठ स्तरावर दाद मागण्याचा इशारा देण्यात आला आहे.

या ठिकाणी 300-500 ब्रास माती उत्खननाची परवानगी असताना प्रत्यक्षात मात्र हजारो ब्रास मातीच उत्खनन होत असल्याचा आरोप आहे. उत्खननात नैसर्गिक नाला बंद झाला असून, येथील पर्यावरणाला धोका निर्माण झाला आहे. याबाबत तात्काळ पंचनामा करुन कारवाई करण्याची मागणी करण्यात येत आहे.