चिमुकल्यासह आईने संपवले जीवन

| रत्नागिरी | वार्ताहर |

दापोली तालुक्यातील गव्हा येथे एका तरुण विवाहित महिलेने आपल्या दोन वर्षांच्या मुलासह विहिरीत उडी घेत आत्महत्या केल्याची दुर्दैवी दुर्घटना घडली आहे. सीया सूरज म्हाब्दी ( 27) आणि समर म्हाब्दी (2) याच्यासह शुक्रवारी (दि.28 ) दुपारच्या दरम्यान विहिरीत उडी मारून आत्महत्या केली.

दापोली शहरापासून जवळच असलेल्या गव्हे येथे म्हाब्दी कुटुंबाचा नर्सरीचा व्यवसाय आहे. पती सुरज, सासू-सासरे हे सगळे नर्सरी येथे कामानिमित्त गेले होते. दुपारी माणसांना चहा घेण्यासाठी सुरज घरी आल्यावर त्याला घर बंद दिसले. पत्नी सीया आणि आपला दोन वर्षांचा मुलगा कुठेही दिसले नाहीत, म्हणून शोधाशोध सुरू झाली. दापोली तालुक्यातच आसूद परिसरात सिया हिचे माहेर असल्याने माहेरीही त्यांचा शोध घेण्यात आला. अखेर दापोली पोलीस स्थानकात बेपत्ता असल्याची तक्रार दाखल करण्यात आली. एका घराजवळ असलेल्या विहिरीजवळ चप्पला दिसून आल्या. सगळ्यांनाच शंका आली आणि तात्काळ या सगळ्या घटनेची माहिती पोलिसांना देण्यात आली. या सगळ्या घटनेची माहिती मिळताच दापोली पोलीस स्टेशनचे पोलीस अधिक्षक अहिरे यांनी आपल्या पोलीस पथकासह घटनास्थळी धाव घेतली. शंका बळावल्याने विहिरीत शोध घेण्यात आला. तेव्हा माय लेकराचे मृतदेह हाती आले. या सगळ्या धक्कादायक घटनेने परिसरातूनही मोठी हळहळ व्यक्त केली जात आहे. सीयाने इतके मोठे टोकाचे पाऊल का उचलले हा प्रश्न मात्र अद्याप कायम आहे. या सगळ्या प्रकरणाची नोंद दापोली पोलीस ठाण्यात करण्यात आली असून पुढील तपास दापोली पोलीस करीत आहेत.