पोलिसांना मिळणार हक्काचे घर

दापोली पोलीस वसाहतीच्या कामाचा शुभारंभ

| दापोली | प्रतिनिधी |

दापोली पोलिसांची वसाहतीची भरपूर दिवसांची असणारी मागणी आता पूर्णत्वाला जाणार आहे. दापोली पोलिसांच्या 46 सदनिका असणार्‍या दोन पाच मजली इमारतीच्या कामाचा नुकताच शुभारंभ झाला आहे. यामुळे दापोली पोलिसांना आता आपले हक्काचे व सुसज्ज घर उपलब्ध होणार आहे.

दापोली पोलीस ठाणे व पोलीस वसाहत ही इंग्रजांच्या काळात बांधलेल्या इमारती होत्या. या इमारती फारच जीर्ण झालेल्या होत्या. यामुळे या वसाहतीत पोलिसांना राहणे कठीण झाले होते. यामुळे अनेक पोलीस अधिकारी शहरात भाड्याने घर अथवा फ्लॅट घेऊन राहात होते. याशिवाय पोलीस कर्मचारीदेखील शहरात राहात होते. त्यातच दापोली पोलीस स्थानकाची इमारत सुमारे दोन वर्षांपूर्वी अचानक आगीच्या भक्ष्यस्थानी पडली. यानंतर या इमारतीचे काम पूर्ण होऊन त्यात पुन्हा पोलीस ठाण्याचे कामकाज सुरू झाले. मात्र, पोलिसांच्या निवासस्थानाचे काम मागे पडले होते.

या पोलीस स्थानकाच्या बाजूला एक सभागृह बांधण्यात आले होते. या सभागृहात त्यावेळी तात्पुरती पोलीस स्थानकाची व्यवस्था करण्यात आली होती. मात्र, आता नव्याने बांधण्यात येणार्‍या पोलीस वसाहतीकरिता ते सभागूह देखील जमीनदोस्त करण्यात आलेले आहे. आता या जागी पोलीस कर्मचार्‍यांच्या प्रत्येकी 23 सदनिका असणार्‍या पाच मजली दोन इमारती उभ्या राहणार आहेत.