वडाळे सरोवराची दुरवस्था

पालिकेच्या दुर्लक्षावर नागरिकांची खंत

| पनवेल | प्रतिनिधी |

जगभरात जागतिक पर्यावरण दिन विविध उपक्रमांनी साजरा होत असताना, पनवेल शहरातील ऐतिहासिक पेशवेकालीन वडाळे सरोवराची मात्र दुरवस्था पाहून नागरिकांनी नाराजी व्यक्त केली आहे.

सरोवर परिसरात मोठ्या वृक्षांचे पडलेले खोड अद्यापही हटविण्यात आलेले नाही. तसेच सरोवरातील पाण्याचे कारंजे अनेक दिवसांपासून बंद अवस्थेत असून, सौंदर्यवर्धनासाठी उभारण्यात आलेल्या लाईट व्यवस्था व त्यावरील बटरफ्लाय आकर्षणही मोडकळीस आलेले दिसत आहे. विशेष म्हणजे या परिसरात दररोज सकाळी आणि सायंकाळी पनवेल महानगरपालिकेचे अनेक अधिकारी व कर्मचारी फेरफटका मारण्यासाठी येत असतात. तरीदेखील या समस्यांकडे दुर्लक्ष होत असल्याची भावना स्थानिक नागरिकांमध्ये व्यक्त होत आहे.

पर्यावरण संवर्धनाचे संदेश देण्याबरोबरच शहरातील नैसर्गिक व ऐतिहासिक वारशाचे जतन करणेही तितकेच महत्त्वाचे असल्याचे नागरिकांचे म्हणणे आहे. जागतिक पर्यावरण दिनाच्या निमित्ताने तरी वडाळे सरोवराच्या सुशोभीकरण व देखभालीकडे पालिका प्रशासनाने गांभीर्याने लक्ष द्यावे, अशी मागणी परिसरातील नागरिक व पर्यावरणप्रेमींनी केली आहे.