कुणबी समाज संघटनेत क्रांती घडविण्याची ताकद – शंकर म्हसकर

। खांब-रोहा । वार्ताहर ।
सोनगांव विभागातील कुणबी समाज संघटित होऊन एखादे कार्य हाती घेतो, त्यावेळी सामाजिक क्रांती निश्‍चितच घडते. हा इतिहास आहे, असे प्रतिपादन कुणबी उच्चाधिकार समितीचे माजी अध्यक्ष शंकर म्हसकर यांनी केले. मालसई येथे आयोजित करण्यात आलेल्या विद्यार्थी गुणगौरव सोहळ्यात ते बोलत होते. यावेळी तालुकाध्यक्ष शिवराम शिंदे, तालुका सचिव दत्तात्रेय झोलगे, युवक अध्यक्ष अनंत थिटे, यशवंत हळदे, ग्रुप अध्यक्ष खेळू ढमाळ, सुनील मोहिते,गजानन मालुसरे, चिंतामणी खांडेकर, महादेव सानप, शंकर शेलार, तुकाराम मगर, यशवंत मोंडे, चंद्रकांत शिंदे, शिवाजी मुटके, संतोष खेरटकर, शंकर कदम, महेश तुपकर, सुशील खांडेकर, दत्ता सानप, हेमंत कडव, मंगेश ढमाल, प्रकाश भोसले, हेमंत मालुसरे, योगेश शिंदे,शरद कदम,प्रभाकर दळवी,नथुराम मालुसरे, विनायक सावंत, शरद कदम, नीकेश कदम,दिनेश कडव, गणेश सानप आदी मोठ्या संख्येने उपस्थित होते.

यापुढे म्हसकर यांनी सांगितले की, कुणबी समाजाने एकत्र येऊन काम केले पाहिजे व संघटना बळकट केली पाहिजे. यासाठी तरुणांनी अधिक योगदान द्यावे. तसेच जातीच्या दाखल्यासाठीचा लढा व संघर्ष सुरुच ठेवण्याचे सुचोवात त्यांनी केले. तालुकाध्यक्ष शिवराम शिंदे यांनी समाजाच्या असणार्‍या समस्या वारंवार मंत्रिमंडळापर्यंत पोहोचत असल्याचे सांगितले. दहावी व बारावीचा मुलांनी उच्च शिक्षण घेऊन उच्च पदापर्यंत पोहोचले पाहिजे व आई-वडिलांचे स्वप्न पूर्ण केले पाहिजे. त्यासाठी कुणबी संघटना नेहमीच मदत करणार असल्याचे त्यांनी सांगितले. विभागीय अध्यक्ष खेळू ढमाल यांना समाजसंघटनेतील अनुभव कथन करताना अश्रू अनावर झाले.

तालुका युवक अध्यक्ष अनंत थिटे यांनी विभागवार झालेल्या युवक संघटनेची माहिती दिली. संतोष खेरटकर, शंकर कदम यांनी आपल्या विभागातील सक्षम संघटनेबाबत व आगामी उपक्रमांविषयी मार्गदर्शन केले. दक्षता समिती सदस्या पत्रकार रविना मालुसरे-भोसले यांनी महिला-युवतींना समाजसंघटनेत सहभागी करण्याची मागणी केली. ज्या-ज्यावेळी समाजासाठी आंदोलन करण्याची वेळ येईल त्या-त्यावेळी महिला-युवती सर्वात पुढे उभ्या राहतील, असे सुचक विधान त्यांनी केले.

यावेळी सैन्यात कार्यरत असलेले मालसई गावचे सैनिक मिलिंद चाळके व संदेश आयरे यांच्या पालकांना सन्मानचिन्ह देऊन गौरविण्यात आले. सोनगांव विभागातील कर्तृत्वसंपन्न व्यक्तीमत्वांचा सन्मान देखील यावेळी करण्यात आला. मनरेगा पुरस्कार प्राप्त नथुराम मालुसरे, दिव्यांग महाराष्ट्र कबड्डी संघामध्ये भाग कामगिरी बजावणार्‍या अक्षय निकम, कृषिनिष्ठ शेतकरी खरिवले इत्यादी समाजबांधवांना सन्मानित करण्यात आले. कार्यक्रम यशस्वी करण्यासाठी विभागीय अध्यक्ष खेळू ढमाल, युवक अध्यक्ष सुनिल मोहिते व सोनगांव विभागातील सर्व कार्यकारणीने मेहनत घेतली. कार्यक्रमाचे सूत्रसंचालन नंदकुमार मरवडे यांनी केले तर आभारप्रदर्शन युवक अध्यक्ष सुनिल मोहिते यांनी केले.