कृत्रिम पाय मिळाल्याने साक्षी ऑलिम्पिकसाठी सज्ज

| अलिबाग | विशेष प्रतिनिधी |
पूरस्थितीत भिंत अंगावर कोसळून पाय गमावलेल्या पोलादपूर तालुक्यातील केवनाळे येथील क्रीडापटू साक्षीला अथक परिश्रमानंतर कृत्रिम पाय बसविण्यात यश आले. तो पाय बसविल्यानंतर दोन्ही पायांवर उभे राहिलेल्या साक्षीचा चेहरा आनंदाने खुलून गेला. आता ऑलिम्पिकमध्ये धावण्याचे तिचे स्वप्न साकार होणार आहे. केवनाळे गावात एका दोन महिन्याच्या मुलाला वाचवताना भिंत अंगावर कोसळून साक्षी दाभेकर (वय 14) ही क्रीडापटू जबर जखमी झाली होती. तिला तातडीने मुंबईत हलवण्यात आले. मकेईएमममध्ये डाव्या पायावर शस्त्रक्रिया करून पाय गुडघ्यापासून खाली कापावा लागला होता. या मुलीची घरची आर्थिक स्थिती अत्यंत बेताची असल्याने पुढील उपचाराच्या लाखो रुपयांच्या खर्चाचा प्रश्‍न उभा राहिला होता. रवींद्र मालुसरे यांनी प्रिंट आणि सोशल मीडियावर याला वाचा फोडल्यानंतर त्याला अनुसरून नगरविकास मंत्री एकनाथ शिंदे साहेब यांनी डॉ.श्रीकांत शिंदे फाऊंडेशन आणि शिवसेना वैद्यकीय मदत कक्षाच्या माध्यमातून ही जबाबदारी उचलली. रुग्णालयात समक्ष भेट देऊन शिंदे यांनी साक्षीच्या उपचारासाठी 5 लक्ष रुपयांची थेट आर्थिक मदत केली होती. यावेळी शिंदे यांनी अत्याधुनिक तंत्रज्ञानवर आधारित कृत्रिम पाय बसविण्याच्या डॉक्टरांना सूचना दिल्या होत्या.

त्यानुसार एकनाथ शिंदे यांच्या हस्ते साक्षी दाभेकर हिला अत्याधुनिक कृत्रिम पाय बसविण्यात आला. यावेळी साक्षी च्या चेहर्‍यावर एकच स्मित हास्य उमटले. डॉ अंकुश सेठ यांच्या टीमने शिवसेना वैद्यकीय मदत कक्षाच्या आणि डॉ श्रीकांत शिंदे फाउंडेशनच्या माध्यमातून अत्याधुनिक कृत्रिम पाय साक्षीला बसविण्यात आला. यावेळी मराठी वृत्तपत्र लेखक संघ मुंबईचे अध्यक्ष रवींद्र मालुसरे, वैद्यकीय मदत कक्षाचे प्रमुख मंगेश चिवटे, धर्मवीर आनंद दिघे चित्रपटाचे निर्माते मंगेश देसाई, साक्षीचे काका रमेश दाभेकर, आणि ग्रामस्थ मंडळाचे ज्ञानोबा दाभेकर, तुकाराम पवार, पांडुरंग दाभेकर उपस्थित होते. दोन वर्षाच्या बाळाला वाचविण्यार्‍या साक्षीच्या धाडसी कामगिरी अतुलनीय असून, राष्ट्रपती बाल शोर्य पुरस्कारासाठी दिल्लीत पाठपुरावा करणार आहे. साक्षीचे ऑलम्पिक मध्ये धावण्याचे स्वप्न असून या स्वप्नपूर्तीसाठी डॉ श्रीकांत शिंदे फाऊंडेशन सर्वोतोपरी मदत करणार असल्याचे खासदार शिंदे यांनी सांगितले.