मातीवर कार्पेट टाकून निधी लाटण्याचा प्रयत्न
। नेरळ । प्रतिनिधी ।
कर्जत तालुक्यातील पाथरज ग्रामपंचायतीतील ताडवाडी-मोरेवाडीपासून खांडस राज्यमार्ग जोडणारा रस्ता डांबरीकरण केला जात आहे. परंतु, हे डांबरीकरण धूळ मातीच्या रस्त्यावर कार्पेट टाकून करण्यात येत आहे. त्यामुळे या कामाचा दर्जा पाहिल्यावर रस्त्याच्या कामासाठी आलेला निधी ठेकेदारांचे खिसे भरण्यासाठी आहे काय?, असा सवाल स्थानिकांमधून उपस्थित होत आहे.
कर्जत-मुरबाड राष्ट्रीय महामार्गावरील वारे गावातून कशेले-खांडस राज्यमार्ग रस्त्याला जोडणारा रस्ता जातो. ताडवाडी गावातील काँक्रिट रस्त्यापासून मोरेवाडी आणि पुढे खांडस राज्यमार्ग रस्ता असे रस्त्याचे डांबरीकरण सार्वजनिक बांधकाम विभागाकडून सुरू आहे. त्या ठिकाणी रस्त्यावर कार्पेट डांबरीकरण करण्यापूर्वी तेथील खड्डे भरण्याची कामे बांधकाम खात्याकडून होणे आवश्यक होते. मात्र, आदिवासी लोकांचे गाव असल्याने ठेकेदाराचा मनमानी कारभार सुरू असल्याचे चित्र सध्या या ठिकाणी दिसत आहे. त्यामुळे या रस्त्याचे डांबरीकरण हे त्यासाठी आलेला निधी लाटण्यासाठीच सुरू आहे, असा आरोप स्थानिक नागरीकांकडून होत आहे.
डांबरीकरण करण्यापूर्वी या स्त्यावर असलेली धूळ आणि माती बाजूला काढली गेली नाही. त्यातच गेली सहा ते सात वर्षे तेथील रस्त्यावर डांबरीकरण करण्यात आले नसल्याने हा रस्ता खड्ड्यात हरवलेला होता. अशा स्थितीत या रस्त्यावर कोणत्याही प्रकारची साफ सफाई न करता कार्पेट डांबरीकरण करण्यात येत आहे. एखादी टोकदार वस्तू जरी रस्त्यावरून फिरवली तरी ते डांबर निघत आहे. त्यामुळे शासनाने दिलेला निधी हा ठेकेदाराच्या फायद्यासाठी दिला होता का, असा संतप्त सवाल नागरिकांमधून उपस्थित होत आहे. तसेच, पावसाळा सुरू होण्याआधीच रस्त्यावर डांबर दिसणार नाही. तसेच, या भागातून रात्रीच्या वेळी अवजड वाहनांची वर्दळ सुरू असते. त्यामुळे रस्त्यावरील डांबरीकरण हे औटघटकेचे ठरणार आहे.
फक्त डांबरीकरण करण्याची मंजूरी
सार्वजनिक बांधकाम खात्याला याबाबत विचारले असता कार्पेट डांबरीकरण करण्याचे काम मंजूर असल्याचे त्यांच्याकडून सांगण्यात येत आहे. त्यामुळे कार्पेट डांबरीकरण होण्याआधी त्या रस्त्यावर खडीकरण करून त्यावर डांबर टाकणे आवश्यक होते. मात्र, बीबीएम डांबरीकरण न करता थेट कार्पेट टाकण्यात येत आहे.स्थानिक पातळीवर संबंधित ठेकेदाराकडून खड्डे भरण्याची कामे केली जात असल्याचे त्यांच्याकडून सांगितले जात आहे. मात्र, सार्वजनिक बांधकाम खात्याच्या माहितीनुसार त्या ठिकाणी सध्या सुरू असलेले डांबरीकरण हे प्रत्यक्ष कार्पेट डांबरीकरण असल्याचे सांगण्यात येत आहे.
ताडवाडी येथील सिमेंट काँक्रीटच्या रस्त्यापासून पुढे मोरे वाडी आणि पुढे कशेले खांडस रस्त्यापर्यंत हा रस्ता बनविला आहे. रस्त्यावरील माती बाजूला न करता डांबरीकरण केले जात असेल तर त्या कामाचा चौकशी केली जाईल.
– संजीव वानखेडे, उप अभियंता,
सार्वजनिक बांधकाम विभाग
हे डांबरीकरण सुरू असताना मी स्वतः साईटवर होतो आणि सर्व काळजी ठेवूनच डांबरीकरण सुरू आहे. त्यामुळे रस्ता चांगला बनविला जात आहे.
– थोरात, शाखा अभियंता, सार्वजनिक बांधकाम विभाग