| पनवेल । वार्ताहर ।
अल्पवयीन मुलीला चार महिन्यांची गरोदर ठेवल्याप्रकरणी एका नराधमाच्या शोधात पोलीस आहेत. पीडीत बालिका 15 वर्षांची असून ती चार महिन्यांची गरोदर झाल्यानंतर तीच्या आईला याबाबत समजले. नेरुळमध्ये राहणारी व मुलांच्या पालन पोषणासाठी घरकाम करणार्या आईने याबाबतची तक्रार नेरुळ पोलीसांना दिल्यावर पोलीसांनी या घटनेची नोंद केली.
पोलिसांनी या घटनेची शोध घेतल्यानंतर पनवेल तालुका पोलीस ठाण्याच्या हद्दीतील फणसवाडी गावात राहणार्या या नराधमाने बालिकेचे दोन वर्षे शोषण केल्याचे पोलिसांना समजले. त्यांनतर तात्काळ हा गुन्हा पनवेल तालुका पोलीसांकडे तपासासाठी वर्ग करण्यात आला. ह्या गंभीर प्रकरणाची नोंद घेत वरिष्ठ पोलीस निरिक्षक रविंद्र दौंडकर यांनी या प्रकरणी पोलीस निरिक्षक अंकुश खेडकर व सहाय्यक पोलीस निरिक्षक अंबिका अंधारे यांचे पथक नेमून याबाबत तपास करण्याची सूचना दिली. पनवेल तालुक्यातील फणसवाडी या गावातील एका तरुणाच्या संपर्कात गेल्या दोन वर्षांपासून संबंधित पिडीताचे शोषण केले जात असल्याचे तीच्या आईला समजल्यावर या घटनेला वाचा फुटली. पनवेल पोलीस या प्रकरणातील संशयीत आरोपीचा शोध घेत आहेत.