जप्त कंटेनर अनेक वर्षांपासून धूळखात

| चिरनेर | प्रतिनिधी |

सीमा शुल्क विभागाच्या विविध विभागाकडून संशयित किंवा तस्करीच्या कामासाठी वापरण्यात आलेले अथवा बनावट कागदपत्रांचा आधार घेऊन आयात-निर्यातीच्या प्रकरणात जप्त करण्यात आलेले शेकडो कंटेनर येथील विविध सीएफएस ठेवण्यात येतात. असे शेकडो संशयित कंटेनर अनेक वर्षांपासून जेएनपीटीच्या स्पीडी कंटेनर यार्डमध्ये धुळखात पडून असल्याचे सीएफएस कामगारांकडून सांगितले जात आहे.

जेएनपीए बंदरातील पाचही खासगी बंदरे आणि त्यावर आधारित उरण परिसरात शेकडो सीएफएस, कंटेनर यार्ड, कंपन्या उभारण्यात आलेल्या आहेत. यामध्ये डीआरए, सीमा शुल्क विभागाच्या विविध विभागाकडून विविध प्रकारच्या तस्करीत वापरण्यात आलेले शेकडो कंटेनर जप्त केले जातात. उरण परिसरातील कोणत्याही कंटेनर यार्डमध्ये तस्करीसाठी वापरण्यात आलेले असे शेकडो कंटेनर मालासकट येथील जेएनपीएच्या विविध सीएफएमध्ये ठेवण्यात येतात. काही कंपन्या कंटेनरमधुन बनावट कागदपत्रांचा आधार घेऊन तस्करीच्या मालाची आयात-निर्यात करतात. अशा चोरट्या मालाची आयात-निर्यात करताना तस्करीत सहभागी असलेल्या कंपन्या आपले बिंग फुटले जाऊ नये यासाठी बनावट कंपन्यांंच्या नावाचाही वापर करतात. तस्करीचा माल पकडला तर अशा बनावट कंपन्या माल ताब्यात घेण्यासाठी पुढे येत नाहीत. मग अशा आयात-निर्यातीच्या बेनामी तस्करी प्रकरणात जप्त करण्यात आलेले कंटेनर बेवारस म्हणुन घोषित केले जातात. अनेक वेळा तर आयात -निर्यात करण्यात येणाऱ्या मालात मोठ्या प्रमाणात आर्थिक नुकसान सोसावे लागते. आयात करण्यात आलेला माल ने- आण करण्यात येण्यापूर्वीच खराब झालेला असतो.अशा प्रकारामुळे मोठ्या प्रमाणात झालेल्या आर्थिक नुकसानीमुळे मालक कंटेनर ताब्यात न घेता तसेच सोडून देतात. काही कंटेनर संशयित किंवा तस्करीच्या कामासाठी वापरण्यात आलेले असल्याने जप्त केले जातात.आयात-निर्यातीच्या प्रकरणात जप्त करण्यात आलेले शेकडो कंटेनर येथील सीएफएस ठेवण्यात येतात असे शेकडो संशयित कंटेनर अनेक वर्षांपासून जेएनपीएच्या विविध कंटेनर यार्डमध्ये धुळखात पडून आहेत.

कंटेनरचे पुढे काय
सीमाशुल्क विभागाच्या ताब्यात असलेल्या अशा कंटेनरची संख्या सध्या वाढतच चालली असल्याचे येथील सीएफएसमध्ये कामगारांचे म्हणणे आहे. त्यामुळे अशा कंटेनरचे पुढे काय होते याची उत्सुकता नेहमीच कामगारांना लागुन राहिलेली असते.