कुंडलिकेच्या तिरावर कबड्डीचा थरार

टिटवीचा राजा, इंदरदेव ठरले विजेते

| रोहा | प्रतिनिधी |

रोहा तालुक्यातील कुंडलिका नदीच्या तिरावर रायगड जिल्हा धनगर समाज प्रीमियर लीग पुरुष व महिलांच्या भव्य जिल्हास्तरीय कबड्डी स्पर्धेचे आयोजन करण्यात आले होते. गाझी शेख सलाऊद्दीन दर्गा मैदानात रविवारी (दि.24) पहाटेपर्यंत सुरू राहिलेली ही स्पर्धा मोठ्या खेळीमेळीच्या वातावरणात पार पडली. यावेळी पुरुष गटाच्या अंतिम स्पर्धेत टिटवीचा राजा या संघाने, तर मुलींच्या स्पर्धेत इंदरदेव या संघाने विजेतेपद पटकावले आहे. अनुभवी आणि होतकरू तरुण आणि तरुणींचा कबड्डीचा थरार पाहण्यासाठी जिल्ह्यातील शेकडो प्रेक्षकांनी हजेरी लावली होती.

जिल्हा धनगर समाज प्रीमियर लीगच्या पुरुष गटात एकूण 9 संघानी आपला सहभाग नोंदवला होता. स्पर्धेच्या अंतिम सामना यारी दोस्ती व टिटवीचा राजा या संघात पार पडला. यावेळी टिटवीचा राजा या संघाने यारी दोस्ती संघाचा पराभव करत प्रथम क्रमांकावर आपले नाव कोरले. या विजेत्या संघाला मान्यवरांच्या हस्ते 40 हजार रुपये व आकर्षक चषक देऊन सन्मानित करण्यात आले. तर, उपविजेता दोस्ती यारी संघाला 30 हजार रुपये व आकर्षक चषक देऊन गौरविण्यात आले. तसेच, तृतीय क्रमांक ठरलेल्या स्काय वॉरीयर्स संघाला 20 हजार रुपये व चषक देऊन सन्मानित करण्यात आले. यावेळी मालिकावीर प्रणय वरक, उत्कृष्ट पक्कड नितीन होगडे, तर उत्कृष्ट चढाई म्हणून अर्जुन आखाडे यांना सन्मानित करण्यात आले.

तर, मुलींच्या स्पर्धेत एकूण 4 संघानी सहभाग घेतला होता. स्पर्धेतील अंतिम सामना इंदरदेव व कागद गोयंडा या संघात खेळवला गेला. यावेळी इंदरदेव या संघाने बाजी मारली. या विजेत्या संघाला 5 हजार रुपये व आकर्षक चषक, तर उपविजेता कागद गोयंडा या संघाला 3 हजार रुपये व चषक देऊन गौरविण्यात आले. या स्पर्धेत मालिकावीर म्हणून सुप्रिया काळे, उत्कृष्ट चढाई हर्षली वरक व उत्कृष्ट पक्कड म्हणून अपर्णा वरक यांना मान्यवरांच्या हस्ते बक्षीस देऊन सन्मानित करण्यात आले. दरम्यान, मुलींच्या सामन्याच्या उद्घाटन व बक्षीस समारंभ प्रसंगी समाज जिल्हाध्यक्ष चंद्रकांत ढेबे, उपाध्यक्ष चंद्रकांत हिरवे, रविंद्र झोरे, दत्तात्रय झोरे, गणेश होंगडे, राजू शिंगाडे, ठकूराम झोरे, तुकाराम वरक आदी मान्यवर व प्रेक्षक मोठ्या संख्येने उपस्थित होते. या स्पर्धेचे समालोचक अलंकार मनवी याने केले.