आदिवासीवाडीत निसर्ग साहस शिबिराचा थरार

मुंबई-पुण्यातील विद्यार्थ्यांचा सहभाग
| पाली/बेणसे । वार्ताहर ।
पेण तालुक्यातील विराणी आदिवासीवाडीत तीन दिवसीय निसर्ग साहस शिबिराचे आयोजन करण्यात आले होते. या शिबिरात विविध साहसी खेळांचा अनुभव विद्यार्थ्यांनी घेतला. या शिबिरात सिएफआय या आंतरराष्ट्रीय संस्थेतील व मुंबई-पुण्यातील विद्यार्थीदेखील सहभागी झाले होते.

या शिबिराचे आयोजन राधा व रोहन मनोरे यांनी केले होते. या शिबिरात विद्यार्थ्यांनी 50 फुट रॅपलिंग आणि 125 फुट झिप लाइन आदी साहसी प्रकार केले. यावेळी विविध नाविन्यपूर्ण खेळातून विद्यार्थ्यांना गटात काम करणे व नेतृत्वगुण विकास आदींचे प्रशिक्षणदेखील देण्यात आले. या शिबिरात विद्यार्थी आदिवासी बांधवांबरोबर तीन दिवस राहिले. या माध्यमातून आदिवासी संस्कृती व जीवनमान आदींची महत्वपूर्ण माहिती विद्यार्थ्यांना मिळाली. यावेळी विद्यार्थ्यांनी म्हशीचे दूध काढण्याचा आनंद घेतला. रोहन व राधा मनोरे यांनी सांगितले की 2006 पासून आम्ही विविध साहस शिबिरांचे रायगड जिल्हा, महाबळेश्‍वर आदी वेगवेगळ्या ठिकाणी आयोजन करतो. जिल्ह्यासह पुणे – मुंबई व इतरही ठिकाणच्या विद्यार्थ्यांचा खूप चांगला प्रतिसाद मिळतो. या शिबिरातून विद्यार्थ्यांना निसर्गाशी मैत्री करता येते. शिवाय सकारात्मकतेशी मेळ, स्वस्थ व लवचिक शरीर, साहसी प्रवृत्ती, कलात्मक विचार, मनावर आत्मविश्‍वासाची सत्ता आणि त्यातूनच घडणारी प्रगल्भ बुद्धिमत्ता आदी गुणांचा विकास घडवून येतो. आगामी शिबीर ज्येष्ठ नागरिकांसाठी आयोजित करण्यात येणार आहे. असे देखील रोहन व राधा मनोरे यांनी सांगितले.