महिलेने फोडला स्थिर सर्वेक्षण पथकाचा कॅमेरा

| पेण | प्रतिनिधी |

सहायक निवडणूक अधिकारी प्रवीण पवार यांच्या आदेशाने खारपाडा पुलावर स्थिर सर्वेक्षण पथक व खारपाडा बोर्ड सिलींग पॉईंट हे रायगड जिल्ह्यात पनवेलकडून येणार्‍या वाहनांची तपासणी करत आहेत. एम.एच.46 सी.एच 5617 नंबरच्या गाडीची स्थिर सर्वेक्षण पथकाने तपासणी करण्यास सुरूवात केली असता त्या वाहनातील प्रियदर्शनी नामक महिलेने शूटिंग करत असणार्‍या अधिकार्‍यांशी हुज्जत घालून विनापरवाना शूटिंग करू नये, असे बोलून कॅमेरामॅन संकेत गायकवाड याच्या हातून शासकीय कॅमेरा हिसकावून तोडफोड केली.

दरम्यान, पोलीस कॉन्स्टेबल राठोड हे आपल्या मोबाईलमधून शूटिंग करीत असताना त्या महिलेने त्यांचाही मोबाईल हिसकावून फेकून दिला. याकामी दादर सागरी पोलीस ठाण्यात प्रियदर्शनी या महिलेविरूद्ध शासकीय मालमत्तेचे नुकसान केल्याबद्दल गुन्हा दाखल करण्यात आला आहे. याबाबत अधिक तपास दादर सागरी पोलीस ठाणे करीत आहे.