महायुतीत अजून आठ जागांवर तिढा

उमेदवारीवरून भाजपाची डोकेदुखी कायम

| नवी दिल्ली | वृत्तसंस्था |

भारतीय जनता पक्षाने उदयनराजे भोसले यांना सातार्‍याची उमेदवारी अखेर मंगळवारी जाहीर केली. मात्र, पूनम महाजन यांच्या उत्तर-मध्य मुंबईसह राज्यातील किमान आठ मतदारसंघाबाबत महायुतीच्या जागावाटपाचा तिढा कायम आहे. अन्य काही जागांवरील उमेदवारीवरून भाजप नेतृत्वाची डोकेदुखी कायम आहे. केंद्रीय अर्थ राज्यमंत्री डॉ. भागवत कराड इच्छुक असलेले छत्रपती संभाजीनगर, शिंदे गटाचे हेमंत गोडसे खासदार असलेले नाशिक, केंद्रीय मंत्री नारायण राणे यांनी दावा केलेला रत्नागिरी-सिंधुदुर्ग, शिंदे गट आणि भाजप यांच्यातील चढाओढ संपत नसलेले दक्षिण मुंबई, ठाणे, पालघर यासारखे मतदारसंघ; तसेच उत्तर पश्‍चिम मुंबई ,उत्तर-मध्य मुंबई या सार्‍या जागांवर महाआघाडीच्या प्रचाराने वेग घेतला तरी महायुतीच्या उमेदवारांबाबत भिजत घोंगडे कायम आहे.

उत्तर-मध्य मुंबई या मतदारसंघातून विद्यमान खासदार पूनम महाजन यांना उमेदवारी देण्याबाबत राज्यातील भाजप नेतृत्व उत्सुक नसल्याचे समजते; पण येथून दोनदा जिंकलेल्या महाजन यांना पर्यायही सापडत नाही, अशी भाजपची अवस्था आहे. येथून उमेदवारीसाठी मुंबई भाजपचे अध्यक्ष आशिष शेलार यांनी अद्याप होकार दिलेला नाही. तसेच पूनम महाजन (उत्तर-मध्य मुंबई) यांच्यासारख्या विद्यमान खासदारांबाबत पक्षाने अद्याप कोणताही निर्णय घेतलेला नाही किंवा जाहीर केलेला नाही.