। नेरळ । वार्ताहर ।
माथेरानमध्ये पर्यटकांची फसवणूक होऊ नये यासाठी माथेरान गिरिस्थान नगरपरिषद प्रीपेड सेवा सुरु करणार होती. परंतू पर्यटन हंगाम संपायची वेळ आली आहे तरी पालिकेकडून वाहतूक व्यवस्थामध्ये सुधारणा आणण्यासाठी आणि पर्यटकांची गैरसोय तसेच फसवणूक होणार नाही यासाठी आवश्यक असलेली प्रीपेड सेवा सुरु झाली नाही. दस्तुरीला घोडेवाले, रिक्षावाले, कुली, रूमवाले यांनी गराडा घालून सतावले तर प्रीपेड सेवा सुरू असती तर आम्हाला इतका त्रास सहन करावा लागला नसता त्यामुळे नगरपालिका ही प्रीपेड सेवा सुरु करण्यास पर्यटकांनी नाराजी व्यक्त केली. माथेरानला लाखो पर्यटक या पर्यटनस्थळाला भेट देत असतात. काही महिन्यांपासून फसवणुकीचे आणि दिशाभूल करण्याचे प्रकार वाढू लागल्याने नगरपालिकेने माथेरानचे प्रवेशद्वार दस्तुरी येथे प्रीपेड सेवा केंद्र सुरू करण्यासाठी घोडेवाले रिक्षावाले-कुली यांच्यासाठी केबिन तयार केली.
दरम्यान, माथेरानमधील पोलीस, वन विभाग, महसूल विभाग यांनी पोलीस स्टेशनच्या प्रांगणात घोडेवाल्यांसोबत चर्चा करून लवकरच प्रीपेड सेवा केंद्र सुरू केले जाईल असे नगरपालिकेतर्फे जाहीर केले होते. पालिकेच्या त्या निर्णयाचे स्थानिक व्यवसायीक यांनी स्वागत केले, मात्र अजूनही कधी सुरू करणार? हा प्रश्न मात्र आजही अनुत्तरित आहे. पर्यटकांची फसवणूक रोखण्याकरिता नगरपालिकेमार्फत प्रीपेड सेवा देण्याच्या हालचाली सुरू झाल्या. केंद्र उभारणीसाठी केबिनही बनविल्या गेल्या, मात्र आजतागायत प्रीपेड सेवा केंद्र सुरू झाले नाही, ते केव्हा सुरू होणार, असा सवाल पर्यटकांकडून विचारला जात आहे.