कंटेनरमधून चोरी करणारे चोरटे ताब्यात

| रसायनी | वार्ताहर |

स्थानिक गुन्हे अन्वेषण विभागाचे सतर्क पोलीस अधिकार्‍यांनी संशयास्पद कंटेनरमधून माल काढताना दोन इसमास अटक केली आहे. सदरचा कपडे, चपला, बूट, टी-शर्ट काढताना चौकशी करण्यात आली. त्यावेळी आरोपी पळत जात असताना त्यांना पकडून कारवाई करण्यात आली.

खालापूर पोलीस ठाण्याच्या हद्दीत पेट्रोलिंग करत असताना स्थानिक गुन्हे अन्वेषण शाखेकडील सपोनि संदिप पोमन व त्यांच्या पथकाला जुना मुंबई-पुणे महामार्गावरील रिंकी पॅलेस हॉटेलच्या बाजूला संशयास्पदरित्या एका कंटेनरमधून दोन इसम काही तरी माल काढत असल्याचे रस्त्यावरून जाताना दिसले. त्यावर संशय आल्याने कंटेनरजवळ जाऊन खात्री केली असताना दोन्ही इसम कंटेनर बंद करून पळून जात असल्याचे निदर्शनास आल्यावर पाठलाग करून त्यांना पकडून सर्व घटनेची खात्री केली. यात त्यांनी सदर कंटेनर माल (कपडे, चपला, बूट, टी-शर्ट) पुणे सनसवाडी येथून मुंबई नेरूळ येथे नेत असताना कंटेनरच्या पाठीमागील सीलवरील कोंयडा खोलून कंटेनरमधील 20 लाख रुपयांच्या मालापैकी त्यामधील 24 हजार रुपयांच्या मालाची चोरी करताना रंगेहाथ पकडले. त्यानंतर कंपनी मालक व ट्रान्सपोर्ट यांना संपर्क करून पुणे येथून फिर्यादींना बोलावून खालापूर पोलीस ठाण्यात गुन्हा नोंद केला. याबाबतची कारवाई सपोनि संदीप पोमन यांच्या मार्गदर्शनाखाली एएसआय राजेश पाटील, प्रसाद पाटील, संदीप पाटील, राकेश म्हात्रे, सुधीर मोरे, यशवंत जेमसे यांनी केली.