कोर्लई किल्ल्यावर पर्यटकांची गैरसोय

पुरातत्व खात्याचे दुर्लक्ष

| रेवदंडा | प्रतिनिधी |

मुरूड तालुक्यातील पोर्तुगिजकालीन कोर्लई किल्ला पर्यटकांसाठी खास आकर्षण ठरत आहे. त्यामुळे पर्यटक मुरूड पर्यटनात कोर्लई किल्ला पाहण्यासाठी हमखास भेट देत असतात. परंतु, या किल्ल्यात होणाऱ्या प्रचंड गैरसोयींमुळे पर्यटक तसेच दुर्ग प्रेमींकडून नाराजी व्यक्त केली जात आहे. या समस्यांकडे पुरातत्व खाते जाणिवपुर्वक दुर्लक्ष करत असल्याचे स्थानिकांमधून बोलले जात आहे.

मुरूड तालुका पर्यटकांसाठी खास आकर्षण ठरत असून या तालुक्याला मिनी गोवा म्हणून संबोधले जाते. येथील निसर्गरम्य परिसर, सुंदर व स्वच्छ समुद्रकिनारा, तसेच लगतच फणसाड अभयारण्य असल्यामुळे पर्यटक या ठिकाणी भेटी देत असतात. तसेच, मुरूडच्या प्रवेशद्वारानजीकच साळावपासून दोन किमी अंतरावर असलेला पोर्तुगिजकालीन कोर्लई किल्ला हा सुद्धा पर्यटकांचे खास आकर्षण ठरत आहे. या किल्ल्याच्या तीनही बाजूस समुद्र असून त्या काळी पोर्तुगिजांना चौफेर तसेच समोरील आगरदंडा किल्ल्यावर नजर ठेवण्यास उपयुक्त असा होता. हा ऐतिहासिक पोर्तुगिज बनावटीचा किल्ला पहाण्यास नित्याने या ठिकाणी असंख्य पर्यटक येत असतात. परंतु, हा किल्ला विविध समस्यांच्या गर्तेत अडकला आहे. येथील असुविधांमुळे पर्यटकांमधून नाराजीचे सुर उमटत आहेत.

कोर्लई किल्ल्यात जाण्यासाठी मार्गफलकांचा अभाव असल्याने पर्यटकांना किल्ल्याकडे जाणारा रस्ता शोधावा लागतो. या किल्ल्यात जाण्यासाठी दोन मार्ग उपलब्ध आहेत. मात्र, याठिकाणी गाईड उपलब्ध नसल्याने किल्ल्यात प्रवेश कोठून करावा, असा प्रश्न पर्यटकांमध्ये निर्माण होतो. किल्ल्यात जाण्यासाठी पायरी मार्ग उपलब्ध आहे. मात्र, तो मार्ग नादुरूस्त असल्याने तो मार्ग अवघड बनला आहे, तर दुसऱ्या बाजूकडून जाताना झाडीझुडूपातून रस्ता शोधत पर्यटक व किल्लाप्रेमी मंडळीना मार्गक्रमण करावे लागते. त्यानंतर मार्गातील अडचणी दूर करत किल्ल्यात प्रवेश केल्यावर जिकडे तिकडे अवास्तव वाढलेले गवत, तसेच रानटी झाडीझुडपी त्रासदायक ठरतात. त्यामुळे किल्ल्यात फिरताना प्रचंड समस्या निर्माण होतात. गेल्या काही वर्षांपासून या किल्ल्यावरील बुरूज ढासळत आहे. मात्र, अद्यापी या बुरूजाचे संवर्धन करण्यात आलेले नाही. तसेच, कोर्लई किल्ल्यावर साफसफाई करीता एकच कर्मचारी असल्याने तेथे घाणीचे साम्राज्य देखील वाढले आहे. त्याचबरोबर या ठिकाणी पिण्याच्या पाण्याची कमतरता आणि मूलभूत सुविधा उपलब्ध नसल्याने कोर्लई किल्ल्यावर येणारा पर्यटक व दुर्गप्रेमी निरूत्साही होत आहेत. यासर्व समस्यांकडे पुरातत्व खाते जाणिवपुर्वक दुर्लक्ष करत असल्याचे स्थानिकांमधून बोलले जात आहे.

पुरातत्व खात्याला निवेदन
कोर्लई किल्ल्यावरील गैरसोयींबाबत कोर्लईच्या सरपंच राजश्री मिसाळ यांनी पुरातत्व खात्यास लेखी निवेदन दिले आहे. त्यात किल्ल्यावर साफसफाई करीता कर्मचारीवर्ग वाढविणे, स्वच्छतागृह, पिण्याच्या पाण्याची सोय तसेच किल्ल्याकडे जाणाऱ्या रस्त्याची दुरूस्ती व मार्गफलक लावणे इत्यादींबाबत मागणी करण्यात आली आहे.