परिवहन सेवा ठप्प होऊन वाहतूक कोंडी

| पनवेल | प्रतिनिधी |

सायन-पनवेल महामार्गावरील खांदा वसाहतच्या मुख्य रस्त्यावर बुधवारी (दि.18) सकाळी अचानक परिवहन सेवा बंद पडल्याने चाकरमानींचे मोठे हाल झाले. कामावर जाणाऱ्या नागरिकांना बराच वेळ थांबावे लागले. बससेवा ठप्प झाल्याने रस्त्यावर खासगी वाहनांची गर्दी वाढून मोठी वाहतूक कोंडी निर्माण झाली. या मार्गावरून दररोज हजारो प्रवासी प्रवास करतात; मात्र प्रशासनाचे पुरेसे लक्ष नसल्याने अशी समस्या वारंवार उद्भवत असल्याची नागरिकांची तक्रार आहे. शालेय विद्यार्थी, महिला व ज्येष्ठ नागरिकांनाही गैरसोयीचा सामना करावा लागला. परिवहन व्यवस्थेतील ढिसाळपणाचा फटका सामान्य चाकरमानींना बसत असून सेवा सुरळीत कधी होणार, असा प्रश्न संतप्त नागरिक उपस्थित करत आहेत. संबंधित विभागाने तातडीने उपाययोजना करावी, अशी मागणी होत आहे.