आगरी समाजातर्फे पोलीस भरतीसाठी प्रशिक्षण

| कर्जत | प्रतिनिधी |

कर्जत तालुका आगरी समाज संघटना यांच्याकडून पोलीस भरतीची तयारी करणाऱ्या तरुणांसाठी मैदानी प्रशिक्षण सुरू केले आहे. या प्रशिक्षणाची अधिकृत सुरुवात धामोते येथील नेरळ विद्या भवन शाळेच्या मागे असलेल्या मैदानावर झाली. समाज संघटनेचे आजीव सदस्य आणि संचालक बाबू घारे यांच्या हस्ते आगरी समाज संघटनेच्या उपक्रमाचा अधिकृत शुभारंभ मंगळवार (दि.4) नोव्हेबर रोजी करण्यात आला.

तालुक्यातील 22 तरुण त्या ठिकाणी मैदानी प्रशिक्षण घेत आहेत. दरम्यान, कर्जत तालुका आगरी समाज संघटना यांच्याकडून तरुणांना पोलीस भरती प्रशिक्षण मोफत दिले जात असून भरती प्रक्रिया पूर्ण होईपर्यंत हे प्रशिक्षण सेंटर सुरु राहणार आहे. पोलीस भरतीची तयारी करणारे तरुणांना आर्थिक बाब लक्षात घेऊन कोणत्याही अकॅडमीमध्ये जाऊन प्रशिक्षण घेता येत नाही. अशा तरुणांसाठी कर्जत तालुका आगरी समाज संघटनांनी मैदानी प्रशिक्षण देण्याचा निर्णय जाहीर केला होता. त्यानुसार गेली महिनाभर तालुक्यातील अनेक गावातील तरुण पोलीस भरतीसाठी मैदानी प्रशिक्षण घेत आहेत. धामोते येथील नेरळ विद्या भवन शाळेच्या मैदानावर हे प्रशिक्षण दिले जात आहे.

त्यावेळी कर्जत तालुका आगरी समाज संघटनेचे अध्यक्ष संतोष पेरणे, उपाध्यक्ष भगवान धुळे, जितेंद्र गवळी, संतोष धुळे, प्रभाकर गवळी, रामदास माळी, महेश भगत, संदीप चंचे, बबलू विरले, सोमनाथ विरले आदी उपस्थित होते. यावेळी समाज संघटनेचे वतीने प्रशिक्षक अनंता भोईर यांचा सत्कार करण्यात आला. मैदानी प्रशिक्षणासाठी लागणारे साहित्य आणि व्यायामाचे साहित्य संघटनेचे संचालक बाबू घारे यांनी उपलब्ध केले आहे त्याबद्दल घारे यांचा तसेच मैदान उपलब्ध करून देण्यासाठी महेश विरले यांचे कर्जत तालुका आगरी समाज संघटना यांनी आभार मानले आहेत.

तरुणांना धामोते येथील मैदानावर आठवड्यातून पाच दिवस सकाळी प्रशिक्षण दिले जाते. दर रविवारी माथेरान घाटात हे प्रशिक्षण दिले जात असून आठवड्यातील तीन दिवस आगरी समाज हॉल येथे जिम निर्माण करून उपलब्ध करून देण्यात आली आहे. तर परीक्षा पेपरासाठी मार्गदर्शन करण्यासाठी तज्ञ उपलब्ध करून देणार असल्याचे समाज संघटना अध्यक्ष संतोष पेरणे यांनी सांगितले आहे.

आपल्या आयुष्य बळकट करण्यासाठी आणि शरीरसदृष्ट होण्यासाठी हे प्रशिक्षण घेण्यात येत आहे. तसेच त्याचे कोच अनंता भोईर म्हणून सर आहेत त्यांना सुद्धा दांडगा अनुभव आहे. त्यांनी साधारण मागील वर्षांमध्ये एक छोटा उपक्रम घेतला त्यामध्ये त्यांचे साधारण पाच मुले पोलीस झालेले आहेत. इतरही समाजातील गरीब मूळ असतील त्यांना खर्च परवडत नाही अशा मुलांनी या संधीचा लाभ घ्यावा.

– बाबू घारे