भीषण अपघात! टुरिस्ट कार ट्रकवर आदळून दोघांचा मृत्यू

एक जण गंभीर जखमी

। खोपोली । प्रतिनिधी ।

मुंबई-पुणे द्रुतगती महामार्गावरील धामणी गावाजवळ भीषण अपघात घडला. मुंबईहून पुण्याकडे जाणाऱ्या टुरिस्ट परमिट कारच्या चालकाचे वाहनावरील नियंत्रण सुटल्याने त्याने समोरील ट्रकला पाठीमागून जोरदार धडक दिली. या भीषण अपघातात दोघांचा जागीच मृत्यू झाला. तर एक जण गंभीर जखमी झाला असून एकाला किरकोळ दुखापत झाली आहे.

मुंबई-पुणे द्रुतगती महामार्गावरील धामणी गावाजवळ मंगळवारी (दि.7) दुपारच्या सुमारास हा भीषण अपघात घडला. मुंबईहून पुण्याकडे भरधाव वेगाने जाणाऱ्या टुरिस्ट परमिट कारचे ब्रेक निकामी झाल्याने चालकाचे वाहनावरील नियंत्रण सुटले. त्यानंतर कारने समोरून जाणाऱ्या ट्रकला पाठीमागून जोरदार धडक दिली. धडकेची तीव्रता इतकी भीषण होती की कारचा अक्षरशः चेंदामेंदा झाला.

या अपघातात गुलाम मुस्तफा शेख (31) व एम. डी. रहयान शेख (33) या दोघांचा जागीच मृत्यू झाला. दोघेही मूळचे पश्चिम बंगाल येथील रहिवासी असून सध्या बेहनाम नगर, बांद्रा (मुंबई) येथे वास्तव्यास होते. तसेच, कारमधील आणखी एक जण गंभीर जखमी झाला असून त्याच्यावर नवी मुंबईतील कळंबोली येथील एमजीएम रुग्णालयात उपचार सुरू आहेत. तर चौथ्या प्रवाशाला किरकोळ दुखापत झाल्याची प्राथमिक माहिती आहे.

अपघाताची माहिती मिळताच खालापूर पोलीस, महामार्ग पोलीस आणि मदत पथक तातडीने घटनास्थळी दाखल झाले. जखमींना तात्काळ रुग्णालयात हलविण्यात आले, तर मृतांचे मृतदेह शवविच्छेदनासाठी खालापूर प्राथमिक आरोग्य केंद्रात पाठविण्यात आले.

सतत सुरू असलेल्या पावसामुळे रस्ता ओला असल्याने तसेच कारचे ब्रेक निकामी झाल्याने हा अपघात घडल्याचा प्राथमिक अंदाज व्यक्त करण्यात येत आहे. या प्रकरणाचा पुढील तपास खालापूर पोलीस करीत आहेत.