पनवेलमध्ये दोन वेगवेगळ्या अपघातात दोघांचा मृत्यू

। पनवेल । प्रतिनिधी ।

पनवेलमध्ये झालेल्या दोन वेगवेगळ्या भीषण रस्ते अपघातात दोघांचा मृत्यू झाला असून, दोघेजण गंभीर जखमी झाले आहेत. एका अपघातात भरधाव दुचाकी रस्ताच्या दुभाजकावर धडकून तरुणाचा मृत्यू झाला आहे. तर पाईप घेऊन जाणाऱ्या टेम्पोला पाठीमागून ट्रकने धडक दिल्याने टेम्पोतील क्लिनरचा मृत्यू झाला आहे. या दोन्ही अपघाताप्रकरणी पनवेल शहर आणि पनवेल तालुका पोलीस ठाण्यात गुन्हे दाखल करण्यात आले आहेत.

पहिली घटना पनवेल शहर पोलीस ठाण्याच्या हद्दीत एनएच 04 बी रोडवर करंजाडे सबवे समोर घडली. मुंबईतील चांदिवली येथील संघर्ष नगर येथे राहणारा आर्यन बेंद्रे (19), दिपेश गोवळकर (19) या मित्रासह दुचाकीवरुन मुंबईहुन पुण्याच्या दिशेने जात होता. त्यांची दुचाकी पनवेल मधील करंजाडे सबवे समोर आली असताना, भरधाव वेगात असलेल्या दुचाकीवरील आर्यनचे नियंत्रण सुटले. त्यामुळे त्याची दुचाकी रस्त्याच्या मधोमध असलेल्या रस्ता दुभाजकारवर धडकली. या अपघतात आर्यन आणि त्याचा मित्र दिपेश दोघेही गंभीर जखमी झाले, दोघांना रुग्णालयात दाखल करण्यात आले. मात्र, त्यापूर्वीच आर्यनचा मृत्यू झाला. आर्यन याने बेदरकारपणे दुचाकी चालवून नेल्यामुळे सदरचा अपघात घडल्याचे आढळून आल्याने पनवेल शहर पोलिसांनी त्याच्या विरोधात गुन्हा दाखल केला आहे. तर दुसरी घटना पनवेल तालुका हद्दीत मुंबई-पुणे एक्सप्रेसवेवर पळस्पे महामार्ग पोलीस चौकीजवळ पहाटे पाच वाजण्याच्या सुमारास घडली. सिमेंटचे पाईप घेऊन जाणारा टेम्पो पुण्याकडे जात असताना, मागून आलेल्या भरधाव ट्रकने टेम्पोला जोरात धडक दिली. सदर धडक इतकी भीषण होती की टेम्पो चालकाचे नियंत्रण सुटून टेम्पो लोखंडी रेलिंगला जाऊन धडकला. या अपघातात टेम्पोमधील हमाल (क्लिनर) पंढरीनाथ राम रेड्डी (59) गंभीर जखमी झाले. त्यांना उपजिल्हा रुग्णालय पनवेल येथे दाखल केले असता डॉक्टरांनी मृत घोषित केले. टेम्पो चालक जालिंदर शिवशरण (40) देखील या अपघातात जखमी झाला असून, त्याच्यावर कामोठे येथील एमजीएम रुग्णालयात उपचार सुरु आहेत.