पाकिस्तानसाठी हेरगिरी करणारे ताब्यात

| नवी दिल्ली | वृत्तसंस्था |

पहलगाम येथील दहशतवादी हल्ल्यानंतर भारत आणि पाकिस्तानमधील तणाव शिगेला पोहोचला आहे. भारताने पाकड्यांची चौफेर कोंडी करण्यास सुरुवात केली आहे. पाकिस्तानला धडा शिकवण्याची मागणी होत आहे. मात्र, पाकड्यांशी दोन हात करण्यापूर्वी अस्तनीतले निखारे शोधण्याचे काम पोलिसांनी सुरू केले आहे. याच पार्श्‍वभूमीवर पंजाबच्या अमृतसर येथून पाकिस्तानसाठी हेरगिरी करणार्‍या दोघांना अटक करण्यात आली आहे.

पंजाब पोलिसांनी पाकिस्तानसाठी हेरगिरी करणार्‍या दोघांना अटक केली आहे. लष्कराची गोपनीय माहिती लिक केल्याचा आरोप त्यांच्यावर आहे. पलक शेर मसीह आणि सूरज मसीह अशी दोघांची नावे आहेत. दोघांनीही लष्कराची छावणी आणि एअरबेसचे फोटो शत्रूराष्ट्राला पाठवले, असे पोलीस महासंचालक गौरव यादव यांनी सांगितले. प्राथमिक तपासामध्ये दोघांचाही पाकिस्तानच्या गुप्तचर यंत्रणांशी संबंध असल्याचे उघड झाले आहे. अमृतसरच्या मध्यवर्ती कारागृहात बंद असलेल्या हरप्रती सिंग उर्फ पिट्टूमार्फत त्यांनी पाकिस्तानशी संपर्क स्थापित केल्याचेही पोलिसांनी सांगितले. दोघांवर ऑफिशियल सिक्रेट अ‍ॅक्ट आणि इतर कलमांतर्गत गुन्हा दाखल करण्यात आला असून, त्यांची कसून चौकशी सुरू असल्याचेही पोलीस महासंचालक गौरव यादव यांनी सांगितले.