साफसफाई न केल्यास टमरेल घेऊन मुख्यालयात धडक देण्याचा इशारा
| पनवेल | वार्ताहर |
कामोठे वसाहतीमध्ये पालिकेचा अस्वच्छ कारभार सुरु असून, अनेक ठिकाणी ई-टॉयलेट बंद आहेत, तसेच सेक्टर 11 मधील सुलभ शौचालयमधील भांडी तुटली आहेत व त्याची साफसफाई होत नाही. शेतकरी कामगार पक्षाने या शौचालयाचे फोटो पनवेल पालिकेला पाठवून निषेध नोंदवला आहे. यावर जर पालिकेने साफसफाई केली नाही तर शेतकरी कामगार पक्ष आणि एकता सामाजिक संस्था पुन्हा टमरेल घेऊन पालिका मुख्यालयात जाऊ, असा इशारा शेतकरी कामगार पक्षातर्फे शहराध्यक्ष अमोल शितोळे यांनी दिला आहे.
स्वच्छतेमध्ये पारितोषिक मिळवण्यासाठी पनवेल महानगर पालिका रस्ते, तुटलेल्या भिंती रंगवण्यावर लाखो रुपये खर्च करत आहे. परंतु, कामोठे मधील ई-टॉयलेट बंद आहेत. सेक्टर 11 मधील सुलभ शौचालयामधील भांडी तुटली आहेत, साफसफाई होत नाही. नागरिकांना याचा वापर करणे म्हणजे नरकात जाणे असे आहे. यामुळे मधुमेह असलेल्या व्यक्तींंची कुचंबणा होत आहे. शौचालय भर मैदानात आहे; परंतु सदर वासामुळे कामोठेमधील मुले येथे खेळण्याचे टाळतात. या मैदानात कार्यक्रम करायचा असेल तर पालिका मात्र भाडे घेण्यास विसरत नाही, मग साफसफाई ठेवण्यास का कुचराई करतात, अशी भावना माजी नगरसेवक प्रमोद भगत यांनी व्यक्त केली.
सिडकोने कामोठे वसाहतीमध्ये 70 लाख खर्च करून सेक्टर 11 व 35 मध्ये सुलभ शौचालय बांधले. अनेक महिने शौचालय वापराविना धूळखात पडले होते. त्यावेळी एकता सामाजिक संस्थेने टमरेल घेऊन पालिका मुख्यालयात येऊ, असा इशारा दिल्यावर तत्कालीन उपायुक्त जमीर लेंगरेकर यांनी तातडीने नागरिकांना उपलब्ध करून दिले. यावेळी आम्ही शौचालयाचे फोटो पनवेल पालिकेला पाठवून आम्ही निषेध नोंदवला आहे, त्याउपर जर पालिकेने साफसफाई केली नाही तर शेतकरी कामगार पक्ष आणि एकता सामाजिक संस्था पुन्हा टमरेल घेऊन पालिका मुख्यालयात जाऊ, असा इशारा अमोल शितोळे यांनी दिला आहे.